Mani, Nov. praw 8 ya hta, J.W laknak hpai simsa lam hpung langai rai nga ai, New Democratic Army-Kachin (NDA-K) hpe Myen npu taw ai Border Guard Force (BGF), Jarit Sin Dap hku, tara shang hkrang galai dat sai re.
Lamang hpe, Jinghpaw mungdaw a sinpraw maga, Miwa ga jarit makau, NDA-K ginjaw Pangwah e buga ten jahpawt hkying 8 a.m. kawn 9 a.m. lapran, galaw wa sai lam, NDA-K kawn chye lu ai.
Ndai lamang hta mi na NDA-K dapdung 3 hpe Myen hpyendap npu nga ai Jarit Sin Dap dapdung 3 hku, hkrang galai kau nna, hpyen hkring lahpa lapai lahkra shakap ai NDA-K dazik hta Myen hpyendap dazik, galai ai lam mung galaw sai lam, lamang shanglawm ai ni tsun wa ai.
Raitim, dapdung up ni yawng gaw, asak 50 ning npu na masha n'nan ni hte hkrai galai bang sai hta--- Chipwi e daju ai BGF Masat 1001 hpe Letang Hkawng Lum, Pangwah makau Lu-pi e daju ai BGF Masat 1002 hpe Sau Ting hte Kambaiti, Sinkyak e daju ai BGF Masat 1003 hpe Wangje Dai Hkawng, ni woi awn ai lam, NDA-K hpyendu dingsa ni kawn chye lu ai.
Myen a BGF ritkawp tara hte maren, asak 50 jan sai hpyen magam n mai gun sai majaw, ya, NDA-K na hkring sa sai asak 50 lahta, magam gun marai 100 ram hpe, Myen hpyen asuya hku nna shata shabrai pinsin (pension) jaw na ga sadi jaw tawn sai lam, Pangwah shiga lawk kawn chye lu ai.
Lamang de NDA-K ningbaw Zahkung Ting Ying hte kaga du salang ni shanglawm nna, Myen de na gaw Hpyen asuya a Naypyitaw mungdan mare daju na, Mungdan Makawp Maga Dap, ningtau hkringmang Du Daju Aye Myint hte Dingdaw Daju (Ma-Pa-Hka) Dap-up (Taimu) Du Daju Soe Win yan sa du wa sai lam, lamang sa du ai ni hpe lakap let chye lu ai.
Mani na nhtoi kawn NDA-K hpe Myen a BGF hku, tara shang hkrang galai kau dat sai lam gaw, shaning 20 ning jan jai lang wa sai, "New Democratic Army-Kachin (NDA-K)" ngu ai shingteng amying, asak htum mat sai lam re.
Shawng de KIO/KIA a hpa-awn salang Zahkung Ting Ying hte Ze Lum yan gaw kanu uhpung na 1968 ning hta ga garan pru let Myen Mung Kummyunit Pati (CPB) a Dapnawng Masat 101 hku, 21 ning jan shanglawm wa sai re.
1989 ning hta CPB ga ayai ai shaloi, dai shaning, December 15 ya hta CPB Dapnawng Masat 101 hpe "NDA-K" ngu galai shamying nna Pangwah kaw ginjaw tawn let tsap wa sai gaw mani ten du hkra, rai nga ai.
NDA-K ningbaw dingsa Zahkung Ting Ying hte lahta tsang salang nkau gaw, ya KIO Tingnyang-up Malai 2 dingsa Dr. Manam Tu Ja woi awn ai, Jinghpaw Mungdaw Rawt Jat Pati (KSPP) hku, Myen hpyen asuya woi galaw ai 2010 ralata poi hta shang shingjawng na matu hkyen lajang nga ai hpe KNG sagawn chye lu ai.
KNG kaw na ading tawk la bang la ai
Subscribe to:
Post Comments (Atom)
No comments:
Post a Comment