Sam mung dingdung daw de daju ai, Wunpawng Mungdan Shanglawt Hpyendap (KIA) a dapba 4 na, dapdung lahkawng hpe n mu mat ai majaw, tam sagawn na matu Myen gaw, N’gawn hpyen ni hpe shangun nga ai lam, buga masha ni tsun ai.
Loikang e daju ai KIA ba (dapba) 4 kaw, dapdung 4 nga ai hta 2 gaw, kade nna ai ten hta gara de du mat ai re, n mu mat ai majaw, Myen hpyen asuya kawn, Munggu, Hpawng Seng, Pangsai hte Muse mare grup gra ni hta, N’gawn hpyen (pyi-tu-sit) ni hte rau, hkyak hkyak tam jep sagawn nga ai lam chye lu ai.
“KIA dapba 4 na dapdung lahkawng mat mat ai, dai hpe taimu (Lashu daju Ya-Ma-Hka dap-up Maj-Gen Aung Than Htut) hku na gara kaw nga ai ngu ai hpe mu hkra tam na matu lit shatsam da ai da,” nga buga masha wa tsun ai.
“Nang de shamu shamawt wa ai gaw, manga ya, kru ya, daram rai sai, kata lam shamu wa ai gaw 2 ya daram re sai, Pangsai, Muse, Hpawngseng, Munggu ndai maga de ayan pyi-tu-sit ni hpe kata lam sagawn na matu dat tawn da ma ai,” nga shi matut tsun ai.
Myen hpyendap gaw, KIA dapdung lahkawng hpe Sakhkung hka ndai hkran, Munggu maga de sa makoi taw nga ai shadu na, tam na matu pyi-tu-sit hte shanhte a hpyendap ni hpe lit jaw wa sai hpe mung chye lu ai.
Ndai pyitusit ni gaw, mi na Myen a hpyen wunkat jaw ngut sai ni hte, n’nan ni lawm ai hte, madung gaw, Munggu hte Hpawng Seng kaw na pyitusit ni lawm ai rai nna, Jinghpaw amyusha malawng re lam, buga kata shiga lawk kawn sagawn chye lu ai.
Nkau mi gaw, hpaga yumga lam lu galaw sha taw ai majaw, nkau gaw hkrit ai majaw pyitusit hta naw shanglawm taw nga ai hte, majan kaja wa byin wa jang gaw, hprawn yen na ni she law ai nga nna, buga masha ni tsun ai.
“Kadai mung kam na hpyen la la ai n rai nga ai, atik anang lahkawn la ai majaw rai nga ai, hprawng jang mung kawa ni hpe woi la ai, kawa hprawng jang kasha hpe woi la ai,” nga nna, N’gawn hpyen dap hte seng nna, shi sanglang dan ai.
“Lama majan byin wa jang gaw, KIA dapba 4 kawn, makawp maga na matu n mai byin na daram, Myen hpyendap gaw n-gun jat da sai hku re,” nga nna hpyen masa hte seng nna mung shi mu mada ai hpe tsun ai.
Lai wa sai 2 ya daram hta, Munggu pyitusit kaw shanglawm ai ni hpe, dapba 4 hte ni kahtep ai shara ni hta lit la mat wa ra na lam, tai (Lashio Ya-Ma-Hka) kaw na matsun tawn sai nga, Myen hpyendap kawn shana wa sai lam chye lu ai.
“Ya yang gaw, dapba 4 hpe ding bai ding na jaw wa na lam nga ai hku re,” nga nna, byin mai wa na masa hte seng nna, buga masha ni maram nga ai re.
KIA a ba 4 hta dapdung No. 2, No. 8, No.9 hte No. 17 ni lawm ai rai nna, lai wa sai shaning hta gaw, Myen hpyen asuya kawn, ndai ba 4 hpe, Jinghpaw mungde dapdung yawng htawt yang htawt snr n’gawn hpyen hpung masum hku hkrang gale yang gale, lahkawng kaw na langai hpe lata na matu dip n-gun jaw wa sai re.
KIA ba 4 mung, Myen asuya kawn kade jahkrit shama tim, n madat ya ai sha, KIO/A hpang ai labau shang shara kaw na, n htawt sit na matu, ja ja ninghkap let, dap jung da ai re.
Dapdung lahkawn hpe n mu mu hkra tam jang gaw manghkang byin wa mai ai lam hpe mung, lahta Sam mung buga masha ni tsun ai.
“Shanglawt ni gaw, manghkang n kam byin na re, raitim shanhte hpe n mu mu hkra tam jang gaw, manghkang byin wa mai ai,” nga, jauman bu ni tsun ai.
Subscribe to:
Post Comments (Atom)
No comments:
Post a Comment