Myen a Amyu Shamyit Democracy: Anhte gaw Asak Jahkrung Ai Democracy De

By Maling Kataw

Dai ni gaw J.W. sha ni a Shawng na ban prat a (tinang a kashu kasha) matu atsawm sha sung sung myit yu nhtawm, daw dan let asak hkrung na aten rai sai. Myen hkringmang daju, snr hpyen asuya a shingnan pati USDP a ningbaw, Ting Tsing (Thein Sein) a “KIO” hpe “ASEAN mungdan e kasi hku shamyit kau na” ngu ai gaw, anhte J.W. sha ni yawng hpe yup su sun nga ai kaw na shabran, sharawt dat ai “bau n-sen” rai nga ai. N chye madat la yang gaw anhte hpe “si du” hpang de woi sa ai n-sen rai nga ai.


Ting Tsing (Thein Sein) tsun ai gaw dai NDA-K hte Dukaba Lasang Awng Wa ni a hpung hpe sha tsun ai n re. J.W. ni yawng hpe hkyen da ai, gran da sai masing hte maren shamyit kau na matu tsun ai rai nga ai. KIO a statement hpe saw lasawn di kau ai hta n ga, dai ndau laika na Federal Union masa hpe mung hpa zawn n nawn ai sha, Myen mung e “Amyu Shamyit Masing” galaw nga ai lam hpe shawa man shabrawng dat ai lam re.

KIO/A laknak n jahkrat ai hku sha mu nga ai gaw hpyen asuya a shut kaba nan re. Byin ra ai gaw hparai KIO/A ni laknak n jahkrat ai sha shakut shaja nga ai lam hpe myit yu ra ai re. KIO a August 30 ndau laika gaw KIO a matu sha kun? Jinghpaw a matu sha kun? snr Myen mung a matu kun? Snr jet ai Munghpawm Myen mungdan a matu kun? ngu ai hpe madaw hpa-awn daw rai nga sai hte maren, myit shachyaw, htai la ra ai re.


Jinghpaw Ni Myen Ni A Hpyen N Re

J.W. sha ni moi kaw nna dai ni du hkra kade a hpyen mung n rai ga ai. Shanglawt n lu shi ai aten hta Alliance maga (101 Lewis hte American Rangers Hpyenla tai let) mungkan a hpyen hpe gasat let nambat 1 hte 2 mungkan majan ni hta padang woi la wa sai. Myen mung shalawt lu na matu mung Fascist Japan hpe gasat padang dip la wa sai. Myen mung shanglawt la ai aten mung Munghpawm Myen Mungdan byin na Shawng myit hkrum ai lam hpe Awng San wa hte galaw wa sai.

Munghpawm Myen Mungdan aten e mung dai hpe ninghkap ai Karen rawt malan ni hpe mung gasat nna Myen mung hpe hkye la wa sai. Dai hpang mung Myen hpyen dap e mung grai kang ka ai hte mungdan a magam hta J.W. hpyen la ni gun lai wa sai (Dukaba Col. Hkun Nawng, Dukaba Labang La, Dukaba Kam Hpang hte kaga ni). Raitim, Myen Hpyen Gumshem ni gaw anhte a hpyen majing rai nga ai lam hpe shawa ndau ai lam mung rai nga ai.

Jet ai Munghpawm Mungdan Woi De Na Malai, Amyu Kaji Ni Hpe Madaw Shamyit

Myen hpyen asuya ningbaw shagu gaw ana lu ai hte Jinghpaw Shamyit masing, Hkristan shamyit masing, KIO shamyit masing hkrai rai nga ai. Dai gaw “Tahkin wuhpawng” ni kaw nna Ne Win, Khin Nyut, Than Shwe, Ting Tsing hte shanhte a luksuk ni yawng maren sha re.

KIO hpe shamyit kau na ngu ai lachyum gaw hparai ta?

1. Democracy hpe ninghkap ai.

2. Jet ai Munghpawm Myen mungdan byin na hpe n ra ai.

3. Panglung ga sadi hpe jahten kau ai.

4. Federal Democracy shakut nga ai Laknak lang ma hkra hpe ninghkap ai lam.

5. Democracy wuhpawng kata shinggan ni yawng hpe ninghkap ai.

6. Jinghpawng shawa gaw Panglung Ga Sadi hte maren Federal Democratic Union rai hpe madi shadaw shakut nga ai re.

7. Myen ana-shin-democracy hpe gaw gap ai lam re.

8. KIO/KIA gaw mungshawa ni yawng a Democracy byin na makawp maga shakut nga ai re, majaw

9. KIO hpe shamyit na ngu ai Htei Sein a ga gaw “J.W. sha yawng hpe shamyit kau na” ngu ai lachyum re.

10. Dai gaw tara shang Myen ana-shin ni a “Amyu Shamyit Lam--- Genocide” masing nan re.
Hparai nga yang, KIO/KIA gaw lai wa sai shanhte a ndau shabra laika hte lakap nna shanhte gaw Myen mung “Federal Democracy” rai na hpe shakut nga ai ni she rai nga sai. Dai hte maren dai ni gaw KIO mi n nga, Jinghpaw mungshawa, Myen mungshawa a myit mada yaw shada ai pandung hte de a lai masa gaw langai sha rai nga ai. Kadai mung amyu, nawku htung, matsan lu su, madang gin hka ai lam n nga ai, yawng gaw Myen mung hta Jet ai Munghpawm Mungdan byin na shakut nga ai hkrai rai nga ai.

Dai hte maren kata na laknak lang ai wuhpung snr laknak n lang ai wuhpawng yawng a “yaw shada lam” hte “pandung” langai sha rai nga ai. Dai gaw jet ai Democracy masa rai nga ai. Dai re majaw KIO gaw shi a ndau shabra ai laika hte maren Jet ai Democracy a matu shakut nga ai ni yawng a Alliance rai nga ai, dai ni a hpyen n re. Shaloi, dai Myen Hpyen asuya a masing KIO hpe shamyit kau na ngu ai lam gaw, Federal Union of Burma byin na matu shakut nga ai kata, shinggan, laknak lang hte n lang wuhpung yawng hpe majan ndau ai lam rai nga ai.

Myen Hpyen Asuya gaw kaga amyu ni yawng hpe masha hku n mu
Myen hpyen Asuya gaw, dai ni du hkra kaga amyu ni hpe masha madang hta n tawn nga ai. Shanhte a masing gaw amyu kaji ni mahkra hpe shamyit kau na masing re hpe asan sha Ting Tsing a ga gaw madun dan nga ai. Kaga amyu ni hpe gaw mayam bai shayam na, shanhte gaw hkawhkam amyu, dai rai hkawhkam hkaw gap na hkan se (kang) hta sha na, kaga ni gaw hkawhkam wa tsun shagu madat na, hkam la na, naw na dusat madang kaw sha mu nga ai re.

Shanhte Myen hta lai nna gaw kaga amyu ni yawng gaw masha zazai, dusat, hpa n chye ai, manya ai, na bai ni, duk shamak ni, masha shingnawm ni hku sha dai ni du hkra yu nga ai masa re. Dai hte maren sha re KIO/A hpe mung Jinghpaw ni hpe mung hpa n chye ai ni, du ladi, manya ni, bawnu n gring ai ni, masha zazai ni hku sha yu nga ai masa re. Dai hte maren KIO/A ni hpa baw Federal Union mi tsun tsun, shanhte na hta gaw “masha shingnawm wa a madang n nga masa” hku sha mu nga ai masa re.

Hpungdim

Dai re majaw, Myen a Democracy ngu ai gaw kaga ni hpe shamyit ai (Heterogeneous Genocide) lai sha arai nga ai. Dai lai hte maren, Hpyen ana-shin ni asuya tai nna kaga amyu ni hpe shanhte ra ai hku up sha na, kasi majan hte shamyit na, kayau kau na, ningbaw ningla daw hte ramma ni hpe sat shamyit kau nan rai nga ai. Dai ni gaw Myen hpyen gumshem magam ni a masing-democracy hte hkawm na na kun? KIO gaw jet ai Federal Union of Myanmar a matu shakut nga sai. Anhte mungshawa ni dawdan let hkawm sa ai lam hte jahkrit shama, sat nat, shapyaw, maidang masawp, shamyawk n lu yang amyu shamyit re ai majan kata e asak hkrung nga sai.

Tengman ai lam hku nna n hkrung ai ni a matu gaw ndai daw prat htum mat sana re. Dai ni KIO/A hte J.W. sha ni gaw ndai prat a koi yen n mai ai labau e tinang gaw masha zazai kun? manya rai nga ai kun? N rai nga ai kun? Hpaji rawng ai kun? Snr n rawng ai kun? Ngu ai lam hpe tatut asak hkrung shapraw dan na aprat rai nga ai. Manang ni manya shachyoi ai kaw asak hkrung ai mung grai na sai, hpa baw galai shai wa sai kun?

KIO/A gaw kadai rai nga sai hpe gaw ndau laika hte gaw shadan dan sai. Ting Tsing tsun ai hte maren Myen Hpyen asuya a KIO/J.W sha ni hpe shamyit ai masing gaw “masha yawng asak hkrung na ahkaw ahkang nga ai Democracy masa” hpe ninghtang chyaw di kau nga ai. Raitim, KIO gaw kadai rai nga ai lam, bai J.W. ni gaw kadai rai nga ai lam hpe gaw asak hkrung lam hta tatut shadan dan na aten rai sai.