Kachin News Group - Kachin Jet ai munghpawm byin na matu Gawda Tara Kanu n’nan ra: KNO | Shiga

            Myen mungdan a shinggan kaw daju ai, mung masa wuhpung, Jinghpaw Wunpawng Amyusha Hpung (KNO) gaw, jet ai munghpawm byin wa na matu gawda tara bai ka ra na re ai hte, ya na ralata poi gaw, mung masha ni a matu hpa akyu n nga ai lam tsun ai.

         KNO a ningbaw rai nga ai, Bawmwang La Raw hte KNG hkrum shaga ai shaloi, shi gaw ning nga tsun ai, “Election (ralata poi) hte seng nna gaw, hpa hkap la na lam n nga ai, shi a constitution (gawda tara) hpe nan anhte ninghkap da sai,” nga tsun ai.

         “Amyu bawsang, mung masha, mung masa pati hte, wuhpung ni ra sharawng ai hku n re ai sha, shanhte ra ai hku galaw majaw, hpa hkap la na lam n nga ai,” nga nna shi matut tsun ai.

          KNO hpe mungdan shinggan kaw du nga ai, Jinghpaw amyusha ni hte madung gaw gap da ai rai nna, 1999 ning hta hpaw hpang wa ai rai nga ai.

         “Mi kaw na mung anhte n hkap la ai, dai majaw shanhte a election law ngu ai mung, madat pyi n ra ai, election law hpe myit mada da ai nkau mung, election law ni hpe bai yu dat ai shaloi gaw myit mada shara n nga mat ai,” nga nna shi matut tsun ai.
         
         Myen ni a election kaw shanglawm ai ni mung Myen asuya hte pawng nna, mungdan hte mung masha a matu n re ai sha, tingkyeng akyu a matu yu nna, galaw ai ni re ngu nna, mu mada ai lam shi tsun ai.
          “Election shang na ni mung, mung masha ni a matu kaja na matu shang ai hku n mu mada ai, hpa majaw nga yang, election law kata kaw nan, mung masha ni a matu kaja ai lam n nga ai,” nga nna, KNO ningbaw kawn tsun ai.
           Ya ten hta, 2008 ning kawn, Wunpawng Mungdan Shanglawt Hpung (KIO), (NDA-K) hte Myitkyina daju Wunpawng Amyusha Mungbawng Rapdaw (WMR) ni jawm hpaw ai Jinghpaw Mungdaw Pranwan Komiti kawn hpaw nin htan dat ai, Jinghpaw Mungdaw Rawtjat Pati (KSPP) gaw, Jinghpaw Mungdaw a malai, ralata poi shang shing jawng na matu hkyen nga sai re.
          KSPP hpe KIO Tingnyang up Malai 2 dingsa, Dr. Manam Tu Ja gaw ningbaw langai hku shang lawm woi awn nga ai rai nna, ndai wuhpung gaw Jinghpaw mung ting hta, rung lakying 40 jan hpe hpaw ninghtan da sai re.
          Gawda tara hte ralata poi rit kawp nan hpyang taw sai majaw, kadai Jinghpaw mi raitim, Jinghpaw ni sha san san mi rai rai, Myen amyusha ni hte pawng nna, galaw ai mi raitim, Jinghpaw amyusha ni a matu hpa akyu nga na, ya na ralata poi hte seng ai lam hpe, Bawmwang La Raw gaw tsun ai re.
          “Jinghpaw amyusha, mung masha ni a matu n re sha, ting nang a matu, shanglawm ai ngu mu mada ai,” nga nna, ralata poi shanglawm ai ni hte seng nna, shi a ningmu hpe tsun ai.
          Mungkan rapdaw hte, mungdan shagu kaw na mung, Myen hpyen asuya a ralata poi hpe n mai hkap la ra na lam shi tsun ai.
          Jinghpaw amyusha ni a matu mung, Myen ni hte pawng nna nga na nga yang gaw, jet ai Federal ngu ai masa hpe gyin shapraw lu na matu, Mungdan gawda tara n’nan hpe bai ka shapraw ra na rai nna, awngdawm ahkaw ahkang lu hkra nga jang gaw, matut nna, gasat ra na re nga shi tsun ai.
        “Election hta shanglawm ai ngu ai gaw, shanhte (Myen asuya) galaw ai hpe hkap la madi shadaw ai ngu ai lachyum rai nga ai,” nga nna shi tsun ai.

KNG kaw na la bang ai