Miwa hka madim gawgap masha n’nan 300, Mali Zup de bai du

Jinghpaw mungdaw, Mali-N’mai Zup hka madim masing hta bungli galaw na matu, Miwa amu galaw masha n’nan n law htum 300 gaw, daini lamu ga jarit kawn Myitkyina de du shang wa sai lam, myi-chyaw-mu buga masha ni tsun ai.


Miwa bungli galaw masha ni hte hka madim gawgap na hta lang na arung arai ni hpe htaw tawn ai, mawdaw kaba (truck) 30 gaw, dai ni Myitkyina de du wa ai re, nga ai.

“Mawdaw 30 hte Miwa bungli galaw ai masha 300 du ai, bilat ga ni, jak rai ni hte hpri ni (hka madim gawgap ai kaw lang na) mung htaw tawn da ai,” nga myichyaw mu buga masha ni tsun ai.


Lai wa sai, April 17 ya shani, hka madim masing galaw ai shara hta bawm kapaw ai a majaw, Miwa bungli galaw ai masha 4 si na, 12 jan hkala hkrum wa sai hte, bungli galaw ai Miwa masha ni yawng mung tinang mungdan de bai n htang wa mat sai raitim, ndai shata kawn, bai du wa ai rai nga ai.

Ya ten Myen asuya mung, Miwa ni bai du shang wa sai a majaw, Mali Zup makau grupyin kaw shanu nga ai buga masha ni hpe, lawan ladan shara htawt sit na matu, ladat amyu myu shaw nna, hkyen lajang nga ai lam, J.W Bawngring Mahkri Shawn Hpung (KDNG) a ningbaw Slg. Awng Wa tsun ai.

“Mare masha ni n kam tim forced relocation (atik anang gawt ai ladat) hku nna shara htawt shangun na matu galaw nga ai,” nga shi tsun ai.

Ndai zawn Miwa ni bai du wa ai a majaw, mare masha ni hpe Myen asuya kawn, shara htawt na matu grau dip n-gun jaw wa sana re lam, shi tsun ai.

Myen hpyen asuya a Jinghpaw mungdaw uphkang rung (Pa-Ya-Ka) kaw na mung, Myitkyina hte Waimaw mare ni hta na, kahtawng shagu hpe masha marai 10 hpra, ndai Mali-N’mai zup mare htawt sit na bungli hta shanglawm galaw na matu matsun tawn sai re.

Ndai bungli galaw na ni gaw, mare masha ni htawt sit na matu matut ninghkap ai rai yang, shanhte a dum nta ni hte nawku jawng ni hpe run kau na matu lit la ra na re hpe chye lu ai.

Bai nna, n’gawn hpyendap de gale sai, Gwi Htu daju moi na Lasang Awng Wa Simsa Lam Hpung hte Jarit Sin Dap de gale sai, Zahkung Ting Ying woi awn ai NDA-K gaw, ndai nta hpya na ni a shimlam hpe la ya na matu, matsun hkrum sai re.

“Waimaw kaw na Kahtawng 46 hte Myitkyina na 58 nga yang kahtawng 104 kaw na masha 1040 ndai bung li (mare htawt na) hta shanglawm na re,” nga Awng Wa kahtap tsun ai.

Bai nna, shi matut tsun ai gaw, ndai matsun gaw, mare masha shada da, snr amyusha shada galaw shangun na masing re, nga ai.

Mali-N’mai hka madim masing shara hta bawm kapaw ai hte seng nna, Myen hpyen asuya gaw, masha rim jep ai lam ni hpe,Jinghpaw mung shara shagu hta, matut manoi galaw nga ai rai nna, ya ten du hkra kadai kapaw ai hpe mung atsawm n chye shi ai re.