Myen mung democracy ningbaw Slgj. Awng San Su Chyi gaw, mungdan kata democracy gawde lam hte amyu bawsang manghkang ni hpe, rau sha hparan sa wa na matu Jinghpaw ni myit mada nga ai re.
November 13 ya, dum nta rim sharen tawn ai kawn lawt pru wa sai hte, Slgj. Su Chyi gaw, “amyusha mahku mara lam hte democracy gawde lam hpe matut galaw sa wa na re lam” tsun shaga wa sai.
Rim da ai kawn lawt pru ai hte, amyusha mahku mara lam hte democracy lam hpe matut galaw na, mungshawa de hkadahka jaw ai Democracy ningbaw Slgj. Awng San Su Chyi.
Myen-Miwa ga jarit shara mi kaw du nga ai, Matsat-4 (8-8-88) Jinghpaw jawngma ningbaw dingsa Slg. Awng Wa gaw, “Shi lawt wa ai gaw, anhte Myen mung hta democracy lu hkra shamu shamawt lam hta grai manu dan ai re. Bai nna, anhte bawsang amyusha ni hte Myen amyusha ni a lapran bawngban sa wa na lam hta mung, grai lu garum na re,” nga ai.
Ralata poi ngut ai hpang, dai ralata poi hta shanhte hpyen asuya a Pyi HKai Hpyu pati, n tara adang la ai hpang, Su Chyi hpe dat ai raitim, shi lawt wa ai gaw, Myen mungdan ting hta shi a lagaw lahkam ningnan bai lahkam hpang wa lu sai. Bawsang myusha ni yawng a matu mung myit rawt hpa re lam, Myitkyina e daju ai Wunpawng Amyusha Mungbawng Rapdaw (WMR) a komiti malawm Slg. Nsang Tu Awng tsun ai.
Shi bai tsun ai, “Amyu bawsang lam gaw democracy lam re, democracy lam mung amyu bawsang lam re. Democracy lam hte amyu bawsang lam gaw maren sha re majaw, democracy lu yang, amyu bawsang manghkang mung hpara lu na re.”
Democracy ningbaw Su Chyi gaw amyu bawsang ni a ahkaw ahkang lam hte seng nna, lai wa sai 2003 ning hta Duwa Maran Zau Awng hpe ndai zawn hkamdahka jaw wa sai re.
“Ngai mung bawsang myusha ni yawng hpe tinang a asai ashan, kahpu kanau hku sha hkam la ai. Dai majaw, amyu bawsang ni lu ging ai ahkaw ahkang gaw lu na re. Myusha ni yawng rap ra ai hku akyu hkam sha lu na re. Myen mung ting na amyusha ni yawng hpe ngai hta garan gin hka da ai lam n nga ai.”
Shawng na Myen mungmasa ningbaw, hkringmang daju U Nu hte Dukaba Ne Win yan hpe Jinghpaw ni n kam ai majaw, ya mung, “Slgj. Su Chyi gaw Jinghpaw ni mai kam ai Myen ningbaw rai kun?” ngu, Jinghpaw salang ni, Duwa Zau Awng hpe kasa dat dat let san shangun ai shaloi, dai zawn Slgj. Su Chyi sadi ga jaw tsun ai lam re.
Duwa Zau Awng gaw, Slgj. Su Chyi woi awn ai NLD pati a Jinghpaw mungdaw Waimaw mare a Mungshawa datkasa rai nna, ya Amerikan mungdan, Florida mungdaw e shanu nga ai re.
Ndai ten, Myen mung e Nambat 2 Panglung zuphpawg galaw lu hka, amyu bawsang ningbaw ni shakut nga ai hta, dai zuphpawng de Awng San Su Chyi shanglawm ai yang grau awngdang na re lam, jawngma ningbaw Awng Wa tsun ai.
Htai mungdan, Jinghpaw Myushayi Hpung (KWAT) a hpaji jaw, Slgj. Shirley Seng mung, “Anhte masum-brum bawngban jahkrum ai lam shawng galaw nna, simsa lam lu ai hpang, democracy uphkang masa hpe Panglung Ga Sadi hte maren galaw sa ai rai yang, kaja dik rai na re”, nga ningmu tsun ai.
Bai, Malesha na Slg. Nhkum La Seng rai yang, “Anhte bawsang amyusha ni gaw, tinang a lagaw tinang tsap let tinang a lawt lu lam galaw ra na re. Shi lawt wa ai gaw, NLD na matu kaja ai raitim, anhte a matu gaw, shi hpabaw lu galaw ya na ngu ai hta she hkan ai. Nye a tinggyeng ningmu hta, shi hpe anhte nau n myit mada yang kaja na re ngu mu ai.”
Su Chyi gaw, amyu bawsang manghkang hte seng nna, gara hku woi awn hparan sa wa na hte, hpyen asuya a shinggyim ahkaw ahkang tawt lai ai lam ni hpe gara hku hparan sa wa na lam ni, langai mung n tsun shi ai majaw, shawng lam de gara hku galaw sa wa na n chye shi ai lam, London e nga ai Jinghpaw Wunpawng Amyusha Hpung (KNO) a ninggawn amumadu Duwa Mahkaw Hkun Sa tsun ai.
“Ta tut kaw masum-brum bawngban hpawng byin wa jang gaw, bawsang myusha ni a matu myit mada shara byin wa na re. Ndai lam n byin wa jang gaw, hpa tsun na shara n nga sai,” nga nna, mying n tsun mayu ai, Wunpawng Mungdan Shanglawt Hpung (KIO) a ginjaw salang langai, tinggyeng ningmu tsun wa ai.
Mungkan Wunpawng Hpung (UN) mung, Myen mung a masa manghkang hpe, daru magam manat tawn ai hpyen asuya, NLD lawm ai democracy uhpung uhpawng ni hte amyu bawsang ningbaw ni, shanglawm ai “Masum-Brum” bawngban ladat de mungmasa mahtai tam na hpaji jaw ai.
No comments:
Post a Comment