Asak kung Jinghpaw nu num lahkawng, roi rip hkrum

By KNG


Jinghpaw mungdaw, Hugawng Pa na asak kung Jinghpaw nu num lahkawng gaw Yuzana company amu galaw masha langai a hkum shan roi rip ai hte adup gayet hkrum sai re.

Ndai mabyin gaw November 13 ya shani byin ai rai nna, nu num langai gaw Wara Zup mare na re ai hte kaga langai gaw Nam Sai mare na re lam, chye lu ai.

Hugawng Pa maling mala hpe jak hte shawt shakrin nhtawm Kumshu hte Nai Kadung sun galaw nga ai, Yuzana company. Sumla: KDNG

Nu num lahkawng hte ni nawn ai ni tsun ai gaw, asak 40 daram re ai hpawmi gaw shinggyim roi rip hkrum nna, kaga asak 60 daram re ai nu num rai yang, ganoi malap hkra adup gayet hkrum ai re, nga ai.

Roi rip hkrum ai nu num lahkawng gaw, ja htu dabang nga ai, Yuzana company sun makau, Ban Kawk mare de gat dut sha nga ai hte, gat dut sa ai lam lapran, nam maling de dai, company masha wa, masu lau la na, ya na zawn roi rip wa sai re lam, dai lam chye ai buga masha ni tsun ai.

“Roi rip ai wa gaw shi dai zawn galaw ngut jang shanhte hpe tsun ai da, ‘ngai gaw 99 (company shara) kaw nga ai re. Ya na zawn byin mat ai hpe, tawng ban ai, ya hpang de bai hkrum ga’ nga tsun na mat mat ai,” nga nna, ndai mabyin hpe chye ai buga masha langai KNG de tsun wa ai.

Ya ten du hkra, roi rip hkrum sai nu num lahkawng gaw, ndai zawn roi rip hkrum ai hte seng nna, kadai hpe shawk na, garum hpyi na mung n chye rai, yak taw nga ai lam matut chye lu ai.

Shanhte mare na mare salang wa mung Myen hpyen asuya a masha ni re majaw ndai lam hpe ahkyak la ya na hta, garum na n re lam buga masha ni tsun ai.

“Mare salang wa gaw, company hte bungli rau jawm galaw ai, bai nna, Myen hpyen asuya hte mung grai hku hkau ai majaw, shi hpa n galaw ya ai,” nga buga masha wa tsun ai.

Ya ten, roi rip ai hte adup kayet hkrum sha ai nu num lahkawng gaw, atsawm sha tsi gawn lajang ya ai lam ni mung n lu ai sha, ningma ni a majaw n lu rawt nna, nta kaw sha machyi taw nga ai lam, matut chye lu ai.

Yangung kaw daju ai, Slg. Hte Myit woi ningbaw nga ai Yuzana Company gaw, lai wa sai 2006 ning kawn Hugawng Pa na, lamu ga eka 400,000 jan hpe, Myen hpyen asuya shimlam jaw ya ai hte atik anang zing la sai rai re. Dai lamu ga ni hta, buga masha ni a, yi, sun, hkauna ni hte Sharaw makawp gaiwang ni mung lawm mat ai re.

Mare masha ni tsun ai gaw, dai shara de, Yuzana company gaw, Myen amyusha bungli galaw masha, mun lam hpe shara jahkrat ya wa sai lam tsun ai.

Mare masha ni gaw, Myen bungli galaw masha ni hte jahkring hkring manghkang byin nga ai rai nna, Jinghpaw myu shayi, num kasha ni a shimlam mung tsang ra nga ai lam tsun ai.

Ya na zawn, Jinghpaw nu num lahkawng roi rip hkrum ai gaw, shawng n’nan lang n rai ai hte, Hugawng de Yuzana company du wa ai kaw na, ndai zawn re ai manghkang ni byin pru wa ai lam chye lu ai.
Shawng e mung, Jinghpaw numsha lahkawng hkum shan roi rip hkrum wa sai rai nna, mare masha langai mung, sat hkrum wa sai lam, KNG sagawn chye lu ai.