Lahta Sam mung, Myen hte Sam hpyen, Shan State Army-North (SSA-N) lapran, November 11, mana de kalang bai gap hkat ai lam byin wa sai raitim, dai hpang matut gap hkat ai lam n nga ai hpe chye lu ai.
Myen hpyendap ni shawng gap ai majaw, SSA-N daju makau, Kunkieng-Wan Lwe kahtawng e minit 45 ram gap hkat wa sai re.
Ndai gap hkat ai lam gaw, Myen Hpyendap de na Dap Nawng Masat 33 hte SSA-N de na dap ba 1 npu, dap dung 24 lapran, byin ai re.
Raitim, ndai gap hkat lam gaw, “SSA-N hpe htu gasat ai hku n re sha, chyam dat ai (ga law saw ai lam) lachyum re” nga nna, hpyen masa yu maram ai ni tsun ai.
Ndai lang hte rai yang, Myen hte SSA-N lapran, mali lang tup, aten kadun gap hkat lam ni byin wa sai re.
Myen hte simsa lam la da ai, SSA-N hpe dap ba 1, 3, 7 hte hpaw ginhtan tawn ai hta, dap ba 3 hte 7 gaw Myen hpyen asuya a Mare Sin Dap (Home Guard Force) hpe hkap la sai re.
Hpa mi rai rai, ya na zawn Myen-SSA-N lapran gap ai mabyin a hpang, Loikang e daju ai KIA Dap Ba 4 mung, tinang hpyendap ni hpe sadi maja na matsun tawn sai lam, chye lu ai.
No comments:
Post a Comment