Myen hpyen asuya gaw mungdan kata na amyu bawsang rawt malan hpung ni hpe shamyit na masing hte, alak mi hpyen n-gun sen 3 hpe mayun shajin nga sai lam, hpyendap kata shiga lawk kawn chye lu ai.
Madung, sak ram ai, hkamja ai hte jet let ai hpyenla ni hpe mungdan kata hpyendap shara shagu na alak mi lata gahkyin la nhtawm, shanhte hpe "kahtap hpyen wunkat" jaw nga ai lam, dai wunkat lung nga ai hpyenla langai a kawa, hpyendu dingsa tsun dan wa ai.
Hpyen asuya a masing hta, 2010 ralata poi hta shi dang hkra galaw nna, dai hpang shi matsun ai Jarit Sin Dap (Border Guard Force) n gale ai rawt malan hpung yawng hpe, mungkan de "n tara ai gumlau hpung ni hku" masat ndau nhtawm, gasat shamyit na re lam, Myen hpyendu ni hpe lakap let chye lu ai.
Ya ten du hkra, Myen hte simsa lam la da ai, bawsang rawt malan hpung 17 hta na, KIO, New Mon State Party (NMSP), United Wa State Army (UWSA) hte Shan State Army-North (SSA-N) ni gaw, BGF hpe n hkap ai re.
Lai wa sai August shata laman, Myen gaw lahta Sam mung na Kokang simsa lam hpung a ginra hpe gasat zing la wa sai hpang, dai ginra makau Minggu ginra kaw jung ai shanhte a hpyendap ni de "shingja tsi lawm ai amyawk pala ni" htaw sa tawn sai lam, dai ginra na daphprawng ni tsun dan wa ai.
Dai amyawk si ni hpe lahta na matsun hte sha gap na ahkang jaw da ai rai nna, shi a atsam gaw masha hpe aten kadun mi mali malap shangun ai lam, myi mam mam shangun ai lam hte n'sa sa chyat wa shangun na re lam, matut chye lu ai.
Myen hpyendap kata shiga hku chye lu ai hta, ya ten, hpyen asuya gaw Cambodia mungdan hta n-gun ja ai Khmer Rouge hpe gara hku shamyit kau sai lam hte, Sri Lanka mungdan hta mung, n-gun kaba ai "Tamil Tiger" rawt malan hpung hpe gara hku gasat shamyit kau sai mahkrum madup ni hpe hka ja nga ai re, nga ai.
Subscribe to:
Post Comments (Atom)
No comments:
Post a Comment