KIO hpe “kasi hku shamyit kau sana”, Myen HMD Ting Tsing tsun

By KNG

Wunpawng Mungdan Shanglawt Hpung (KIO) hpe “kasi hku shamyit kau sana re lam” Myen hpyen asuya Hkringmang Daju Dukaba Ting Tsing gaw, lai wa sai bat mi jan, ndai September praw de tsun mat wa sai re.



HMD Ting Tsing (Thein Sein) gaw, shi Myitkyina e Lawayang Daju, Lasang Awng Wa N’gawn Hpyen hte Pangwa Daju NDA-K Jarit Sin Dap na du salang ni hpe alak mi shaga hkrum ai shaloi, ndai ga tsun mat ai lam, na chye lu ai.

Ting Tsing gaw, “Ralata Poi ngut ai hte gaw KIO hpe No.1 Sinpraw-dingda Asha (ASEAN) hta kasi hku shamyit kau sana re” nga, shi npu taw ai J.W laknak hpai hpung lahkawng hpe tsun mat ai lam chye lu ai.

Ndai zuphpawng de, Lawayang Pyi-tu-sit ningbaw Lasang Awng Wa sa du lawm nna, NDA-K Jarit Sin Dap na gaw ningbaw Zahkung Ting Ying a malai kaga du salang ni sa du ai lam chye lu ai.

Hpyen asuya kaw nna KIO hpe “Langai, bawngban na lam hpaw ya sai. Lahkawng, Jarit Sin Dap (Border Guard Force) gale na tsun yu sai. Masum, Pyi-tu-sit (N’gawn Hpyen) gale shangun yu sai. Mali, laknak jahkrat na matsun yu sai. Raitim, KIO n hkap la ai majaw, ya gaw ah-lin-shang (Laknak hpai asum shang wa ai lam) wa tim, hkap la sana n re nga”, Myen HMD tsun wa sai lam chye lu ai.

Shi matut nna, KIO hpe kahtap pat hkum mat wa na lam mung tsun wa sai. Dai gaw-- Myen kata de nga hkawm ai KIO/KIA masha ni hpe ahkyak la rim na lam, Shanglawt a hpaga yumga lam pat hkrum na lam, Shanglawt magam gun ni a dinghku masha ni pru pru shang shang lam hpe jep mat wa nhtawm, kaga uhpung uhpawng masha ni Shanglawt ginra de pru-shang lam hpe n galaw na lam ni re.

Raitim, sinat laknak hte asum hkam (Ah-lin win) shang wa ai KIO/KIA ni hpe rai yang, “ari n jaw ai sha, hkap la mat wa na re lam” mung, zuphpawng hta tsun shaga wa sai lam, kahtap chye lu ai.

KIO gaw, Myen a “September praw 1 ya kaw nna laknak jahkrat hpang wa mu” ngu ai matsun hpe n hkap la ai lam, August 30 ya shani ndau laika shapraw dat ai hpang, ndai zawn HMD Ting Tsing a shagyip ai ga pru wa ai rai nga ai.

Nde a shawng, dai ning February shata e, Ting Tsing gaw Putau de du ai shaloi mung, Rawang hte Lisu buga salang ni hpe alak mi shaga hkrum nhtawm, “Nanhte hpe Jinghpaw ni kade sat sai (1968, KIO-Rawang lapran byin ai Hkrang Hku Manghkang hpe madi madun ai). Nanhte Jinghpaw ni hpe sat na i? Sat na rai jang, laknak htuk jaw na” ngu, J.W shada da sat hkat wa na, wan shat jaw dat sai re.

Dai hpe, Lisu salang ni hkap la ai lam hkrak n nga tim, Hkawnglanghpu daju Rawang laksan Pyi-tu-sit Hpung (Tawng-Chyan-tu San-Chyin-Ye Ah-hpoi) a ningbaw Lauban Tanggu Dang gaw hkap la sai rai nga ai.

2007 Lawu Myen mung de Bukda Hpungkyi ni a hpyen asuya ninghkap n-gun madun ten, dai ninghkap poi hpe hpyen n-gun hte hparan shazim ai ten hta mung, Ah Dang gaw shi a hpyenla 200 jan hpe, Putau kawn Naypyitaw de shangun dat sai re.

Myen hpyen asuya gaw, du na November praw 7 ya shani ralata poi galaw nhtawm, shi bai tara shang asuya tai wa sana re. Dai hpang, asuya n’nan gaw KIO hte kaga rawtmalan hpung ni yawng hpe gasat shamyit wa sana rai nga ai.

Ndai ten, hpyen asuya a hpyen masa mungmasa grau grau ninggam jat shagyip shagyeng hkrum nga ai KIO gaw, “shi shawng gaw Myen hpe majan baw na n re” nga nna, uhpung ningbaw ni tsun nga ai.