MASAT (I) MUNGKAN MAJAN NA JI WA NI A ARAWNG NINGSANG

Sub. Maj. Pangkum Zau Tu. I.D.S.M, O.B.E (Honorary Lieutenant).

Jinghpaw Hpyendap Labau laika buk hte maren, ndai du wa gaw share shagan ai mying kaja shagrau dazik hte Sub. Maj. Pangkum Zau Tu I.D.S.M, O.B.E, (Honorary Lieutenant King’s Orderly officer V a buhpun hking sumraw nna tinang a buga de nhtang wa lu ai wa re. Ya dai hkawhkam hking hpe Myitkyina, Nawngnang, K.T.C. madun gawk hta mu lu ai.
Lakmat hpe yawng a shawng hkamk la lu ai. Shi a kangka ai kyang lai tsam marai hte sadi dung ai myit kraw hpe mu chye ya sai hte maren, 1931 ning hta English Hkawhkam George V a asak sing “King’s Orderly Officer” du magam hpe England mung London mare e shata kru gunhpai lai wa sai lam chye lu ai.


Sub. Maj. Myihtoi Naw.

Ndai du wa gaw Mesopotamia de majan sa ai hta naik agyi aya hte shang lawm sai. Lam shagu hta kangka share shaganai hte maren arawng aya ni tsang hte tsang rawt mat wa sai.1935 ning May shata (6) ya shani galaw ai England mung George V Hkawhkam a Gumhpraw Jubili masat Poi hta mung; 1937 ning May shata 12 ya shani na England Hkawhkam George VI a janmau gup poi (Coronation Ceremony) de mung sa du shang lawm lu ai hta n-ga, Hkawhkam George VI a asak sin du aya “King’s Orderly Officer” magam hpe mung shata kru tup kangka ai hte gunhpai da sai lam labau hta prat dingsa mulu na rai nga saga ai. Shi gaw England mungdan de Subedar aya hku sa wa nna nhtang wa ai hpang Subedar Major de sharawt ai hkrum sai. Shi lu la ai masat dazik ni yawng kru tup rai nna shagrau shaa ai muing kaja lakmat ni grau law la nga lu ai.


Rfn. Maran Gam.

No. 350. Hpyenma tsang rai nga tim, lam shagu kangka ai hte hkum gawng shingyan galu kaba shingkang rawng ai wa rai nna, Subedar Myihtoi Naw a ningtum ma Orderly hku England mung de hkan sa ai lamchye lu ai. Rfn.Maran Gam gaw hpang de Captain Maran Gam (Du Jum) byin tai wa sai rai.

Subedar Major Jinghpaw Gam.

O.B.E. Manmaw mare na English Asuya a Burma Military Police Dap hta 1898 ning April shata e hpyen shang hpang ai. 1912 ning hta V.C.O. (Viceroy’s Commissioned Officer) ngu ai Hkawhkam malai kaw nna jaw ai hpyendu aya Jemadar tsang hpe lula sai. 1914 ning hta Subedar tsang de sharawt ya ai hkrum sai. 1917 ning Mesopotamia mungdan de Germany majan gasat sa ai hta Chyurum Jinghpaw Wunpawng myit rum manang ni yawng a hpu-awn lit la gunhpai lai wa sai. 1921 ning Malabar majanngut ai hte rau Subedar Major tsang sharawt ya ai hkrum sai.O.B.E. hpe tsaw dik ai tsang 1st .Class hku masat ya ai hkrum sai. Shata shabrai hta kaga Rs.60/- hpe shata shagu prat tup htuk sha lu ai hta n-ga lak san mying kaja kumhpa hku nna Rs.10/- hpe prat lahkawng htuk sha lu na arawng kumhpa lu la wu ai.1926 ning hta hkringsa (pension) la nna dum nta e wa nga yang, 1944 ning hta Japan ni e rim nna English ni a kin-yu re ngu sat kau ya sai majaw, anhte nlang a matu nachying yawn hpa shara rai nga sai.
Shi gaw Masat I. Mungkan Majan ten laman hte hta na Chyurum Jinghpaw Wunpawng hpyen ni yawng a hpyen jaubu kawa tai lai wa sai rai.


Honorary Capt. Myitung Tang.

O.B.E., I.O.M. Ndai du wa gaw 1908 ning hta hpyen shang hpang ai Chyurum Jinghhpaw Wunpawng, Lisu bawsang wa rai nga ai. Shi hpyen shang hpang ai ten hta shabrai rupee lap 9/- sha rai nna 28 ning tup hpyen magam gunhpai ngut nhtawm shabrai Rs. 270/- sha ai aten 1937 ning hta hkringsa pension la nna bu ga de wa nga sai. Shi gaw shagrau dazik jahku tup hpe mung lu la ai wa rai nga ai. Dai dazik ni gaw (a) 1914-115 majen je dazik,(b) 1914-18 Germany Great war dazik, (c) 1914-19 Great war lamu kasa dazik, (d) I.O.M. Share shagan dazik, (e) Kurdistan majan dazik, (f) 1930-32 Myen gumlau majan dazik, (g) 6-5-1935 King George V a jubile dazik, (h) 12-5-1937 King George VI. Janmau gup poi dazik hte (i) O.B.E.2nd . Class dazik 1935 ni rai nga lu ai rai.



Subedar Major Lasang Gam. K.V.M.


Ndai duwa mung Chyurum Jinghpaw Wunpawng sha Lisu bawsang rai nga ai. 1914 ning hta hpyen shang nna 1932 ning du hkra gunhhpai shakut shaja sai
. Mesopotamia majan de dapkung dap jau (Comany Quarter Master) hku nna hkan nang ai.Kyan lailen kaja ai hte kangka sadi sahka rawng ai majaw arawng aya ni rawt lung mat wa sai. 1931 ning hta George V. Hkawhkam a sak sin ai (K.O.O.) magam hpe shata 4 tup gunhpai lai wa sai. K.V.M. (King’s Victoria Medal) ja dazik hpe George V. Hkawhkam wa nan shagrau ya ai hkam la sai wa rai nga ai. Shi gaw 1952 ning September 12 ya shani sumsing wundoi mat wa sai.
( 4 ) Subedar Chyauchyi Naw.
Ndai duwa gaw 1909 ning hta laika tsang sanit awng ai hpang 1910 ning April 10 ya hta hpyen shang hpang sai. Dai ten na hpyenla ni yawng hta hpaji kaba dik sai wa re majaw, yawng a matu shabrai shawn tawt jaw ai rung bungli (Pay Havilder) aya hpe shawng lu galaw ai wa re ai. Mesopotamia majan de mung rung amu (Staff) bungli hku hkan nang sai. Laika chye ai masha taw ai majaw 31-12-1919 du hkra rung bungli hkrai galaw ang mat nu ai.4-6-1921 hta Dapdung Dap Jau Du aya (Battalion Quarter Master Jemadar) hpe lu la nu ai. 1-8-1927 hta Subedar aya bai lu sai. 1-11-1930 ya shani magam gun ladaw hpring sai hte maren pension la hkringsa mat sai.
Kaga dan dawng ai hpyendu ngu na Sub. Maj. Pangkum Zau Tu hte Sub. Maj. Myihtoi Naw yan a lam hpe london mare sa du ai lamang hta lawm sai.



KA MAZING KYEM JAHTING DA YA AI NI.


Chyurum Jinghpaw Wunpawng sha ni a moi moi prat na labau maumwi ni hpe jaiwa dumsa ni e kyem rem hkrat wa ai zawn, ya ndai hpyendap labau hpe mung maigan shanhpraw du ni she matsing sumhting kyemda ya nga mi ai. Dai ni gaw;-
(1) Major C.M Enrilquez (85th .Burma Rifles)
(2) Lt. Col. Langtry.
(3) Miss Gillows.
(4) Capt. L.A. F. Gilbert. (Army Indians Recruiting Officer) ni rai ma ai. Lai mat wa sai ten ni hta ndum shami atang ahpa nawn ai lam ni gaw, ya daini ten hta manu dan ai labau byin tai wa lu nga ai zawn, ya ten hta atang ahpa nawn ai lam ni mung du na ten hta manu dan ai labau byin tai wa na hpe sawn dum let labau ka mazing kyem jahting chye ra saga ai.


MASAT (II) MUNGKAN MAJAN NA JI WA NI A ARAWNG NINGSANG