Miwa Hkringmang Daju Wan Chya Bau a Myen mung de lahkawng ya, June praw 2 hte 3 ya shani sa du gawan ai hkrunlam gaw, 16 ning laman, Miwa HMD a shawng n’nan lang sa du gawan ai lam re.
Miwa gumsan magam Hu Jintao hte, Miwa asuya madu ai CPI, lit la galaw nga ai Jinghpaw mungdaw Mali-N'Mai Zup hka wanjak masing kaba.
Shaning 20 ning jan uphkang wa sai, N.W.T, N.A.Hp Myen hpyen asuya a lakhtak hta, Myen mungdan kata e, Miwa ni a ka-up hkrum mat ai hta, Miwa hte lamu ga jarit matut ai, Jinghpaw hte Sam mungdaw lahkawng gaw, grau sawng dik rai nga ai.
Jinghpaw mungdaw hta nga pra nga ai Jinghpaw Wunpawng sha ni, tinang mungdan kata na pru ai, manu dan ai nhprang sut rai ni hpe n madu lu ai, Miwa a lata de sha yawng du mat sai re.
Gun rai hpaga lam hta Miwa shara la kau ai zawn, buga masha ni ban hte ban nga lai wa sai lamu ga, sun, gaiwang, hkai nmai sun ni hpe mung, hpyen asuya a ahkang jaw ai hte maren, Miwa ni yawng madu sha mat sai lam Waimaw buga na, hpung sara langai tsun wa ai.
“Anhte kaga ten e tinang a lamu ga ni ja htu shara ni mung, mi gaw shanghkawp hte gawbya hte htai lau hte htu rai na, tinang a kashu kasha ni hpe bau ai. Jawng shabrai jawng jarik ni dai hku mahkawng, ya gaw dai n nga mat sai, yawng Miwa lata kaw rai mat sai. Ya gaw, anhte lamu ga kaw, anhte jang sha ra ai. Jahpawt myi n mu kaw na sa galaw, shana de myi n mu hkra galaw yang kade ngu, dai shachyut sha ra mat sai. E...dai daram re na, anhte a kam maga, Miwa lata kaw e, Miwa kade ram jum mat ai ngu hpe hkam sha nga ai.”
Dai pi, lani mi bungli nchyang chyang na matu, myi n mu ten jau sa nna, bungli galaw lakmat (tungkin) lu la dep yang she, bungli galaw na ahkang lu nhtawm, tungkin n lu mat yang, kaman rai mat, bai nhtang wa ra ai lam chye lu ai.
Buga masha ni gaw, shawnglam de masing hkrak n nga ai, maigan Miwa ni madu ai magam bungli ni hta, kamhpa machyu let gawat sha nga ai masa de du taw nga ra ai re.
Jinghpaw mungdaw kata pru shajang nga ai ahkyak dik hpaga lam, madung shara shagu hta e, Myen hpyen asuya ahkaw ahkang hte maren Miwa ni hkrai shara la tawn masai.
Ya ten Miwa sut madu ni, Jinghpaw mungdaw kata sut masa lam hte ga-up madu tawn ai lam hpe, Jinghpaw-Miwa ga jarit daju, J.W Bawngring Mahkri Shawn Hpung (KDNG) a ningbaw Slg. Awng Wa hku nna sanglang wa ai.
“Lungseng hte seng nna, Hpakan ginra hkan Myen asuya hte pawng nna, kam mara galaw ai. Ja hte seng nna, Hugawng ginra, Mali Hka, N’mai Hka hkan e mung, dingyang htu sha taw ai. Chihpwi, Sawlaw maga de ‘Mu Hawm (Miwa hku),’ snr. Inglik ga hku Molybdenum ngu ai nhprang sut rai, dingyang htu shaw sha taw ai. Hpun ni hpe Mali Hka sinpraw hkran maga de gaw, ma ai ram rai sai. Sinna hkran maga de hpun ni hpe shaw sha taw ai. Myihprap wan, hka madim kaba ni shachyaw ai. Nkau mi gaw, ga jarit hkan langu sun ni, kaga sun ni hpe galaw ai. Anhte mungdan shara shagu, Miwa ni shanhte kam mara shaw sha na, kam mara rai na she nga taw nga ai, dai gaw anhte myichyaw mu ai lamang ni rai nga ai.”
Ndai hpaga masing ni hpe, Myen hte Miwa jawm galaw ai hta, madung ga jarit kawn Miwa mung de shalai dut sha nna, nkau gaw wanleng hte hka sanghpaw hku, maigan de shalai dut sha nhtawm, akyu hkam sha nga ai lam matut chye lu ai.
Miwa a npu taw let, sakhkrung nga ai, mungshawa ni hta akyu hkam la ai lam chyawm gaw, Miwa lang ai, chemical (shingja tsi) arai ni, buga ginra de lwi hkrat nna, dai buga masha ni machyi makaw hkrum ai hte Sun nchyang chyang hkawm ai hta sun kaw gat ai tsi mawan (shingja tsi) lang nna, dai tsi kawn ana ahkya ni byin hkrum hkra nna jam jau taw nga ai sha n-ga, makau grupyin hten za lam grai law wa nna, shoi chyum nga ai lam ni hpe sagawn chye lu ai.
Ya ten hta, grau nna shoi chyum hkrum nga ai ni gaw, Myitkyina, Tang Hpre mare, Miwa asuya hpe madung dut jaw na, Mali Zup hka madim kaba shachyaw ai majaw, atik anang htawt sit hkrum nga ai, mare 47 na buga masha ni rai nga ai.
Jinghpaw mung kata e, Miwa ka-up ai lam gaw, buga masha ni shani shagu lu sha, jai lang ai, arung arai yawng mung, Miwa shapraw tawn ai, manu hkyam sa nna hten loi ai arai ni hkrai lang nga ai lam, chyauman buga salang langai tsun wa ai.
“Ganing n chye di sai gaw, maning moi ning gaw n ra ma ai. Raitim ya gaw, n ra ai ngu na n mai sai le. Aloi loi sha lu la ai le. N lang n mai, shani shagu lang ra ai, shanghkawp, ningwa, nhtu, Myen mung kaw na n lu du ai. Pu, shagri hkan bawng wa ai, n hkam n kaja lam gaw jat wa le, shat mai a majaw le. Kade tsun tim, lu ai kaw na sha ai. Shakau hkyeng shakau hpraw mung, Miwa kaw na n mai lang ai nga chye ai, chye tim, n-gun n nga ai. Miwa gaw ginhtawng Yanam lu sha hkra galaw ai le. Shanhte anhte hpe n dut n jaw yang, matsan hta matsan na hku mung ang ai hku rai sa!”
Dai re majaw, shani shagu na sakhkrung lam gaw, Miwa hpe sha kam hpa nga ra hkra Myen hpyen asuya gaw, lai wa sai 1990 ning kawn, ahkaw ahkang jaw wa ai re.
Miwa ni ya na zawn sha maden nna, kam mara galaw nga yang, mungmasha ni sut hpaga, hkamja lam, hpaji lam, sut su nga mai lam grau hkrat sum wa na re lam, Salang Awng Wa shi a ningmu hte tsun wa sai.
“Hpaga hta Miwa ni up sha, dip sha nga ding sa gaw, anhte grai hkrat sum na lam sha nga ai hku re. Dai majaw anhte ndai Myen hpyen asuya n nga na matu ahkyak ai. Democracy mungdan, Munghpawm mungdan langai byin nna, sut masa hpe wanglu wanglang galaw ai policy langai mi jahkrat ra ai, anhte ni nan mung, sut hpaga yumga hta myit lawm ra ai galaw ra ai, shakut shaja ra ai. Dai yang gaw anhte lusu sahti ai masha ni byin wa na, dai yang she anhte bran wa na.”
Subscribe to:
Post Comments (Atom)
No comments:
Post a Comment