Mali Zup hka madim a majaw, shawng n’nan mare langai htawt sit hkrum sai

KNG

Manghkang byin nga ai, Jinghpaw mungdaw Mali-N’Mai Zup hka madim masing hta, shawng n’nan Jinghpaw mare langai hpe, daini Myen hpyen asuya ahkaw ahkang lu ni atik anang htawt sit kau sai re.


Ndai gaw, mani sha, Htai mungdan daju J.W Bawngring Mahkri Shawn Hpung (KDNG) kawn Miwa gumsan magam Hu Jintao de laika hte Mali Zup hka madim masing hpe jahkring kau ya na matu hpyi lajin dat sai hte, galaw wa ai lam re.


Mali Hka hte N’Mai Hka lapran na “Mazup Mare” ngu ai hpe, Myitkyina de na lung wa ai asuya masha n-gun 200 ram shanglawm ai hte, hpyen asuya hku nna shara jahkrat, dum nta gap tawn ya ai, Lungga Zup mare n’nan de, atsai awai htawt kau ai re lam, buga masha ni tsun ai.

Hpyen asuya ahkaw ahkang lu ni gaw, kahtawng masha ni a dum nta ni hpe atik anang run kau ya nhtawm, shanhte a dinghku rai ni hte masha hpe, mawdaw kaba ni hte htaw nna, masat tawn ai shara de htawt sit kau ai re lam, myi-chyaw-sakse ni tsun ai.

Ndai zawn galaw ai hta, hpyenla ni, Pyi-htawng-tsu Chyat-hkai-ye nit Hpwi-hpyu-ye-ahpoi masha ni, asuya magam dap masha ni hte aming hte saw shaga hkrum ai mungmasha ni shanglawm ai lam, shanhte hte ni kahtep ai shiga lawk tsun ai.

Mazup Mare gaw, Myitkyina a dingdung de deng 28, Tang Hpre mare lahta kaw nga ai rai nna, dum nta htinggaw 63 hte masha n-gun 150 jan ngai ai re. Raitim, ya gaw, hpyen asuya shara jahkrat ai hku, mare a dingda de deng 11 tsan ai, Lungga Zup de, mare ting htawt sit hkrum sai re.

Dai shara e shanhte a matu gaw gap tawn ai dum nta ni gaw hpun pyen hte hpri hpraw galup rai nna, wang dam de pe 40 X 60 grupyin re lam, buga masha ni tsun dan ai. Ndai shara ningnan hta shanhte a matu hkai lu hkai sha na sun wang mung n lu ai sha n ga, hkai lu hkai sha mung n kaja ai lam, chye lu ai.

Shakram ra sai, Mazup Mare hta gaw, ga sau namhpun mung grai kaja ai majaw, buga masha ni sha n ga, htingbu Tang Hpre buga masha ni du hkra, yi sun galaw sha nga ai shara mung re lam, chye lu ai.

Mali Zup hka madim masing kata na mare buga ni yawng hpe htawt sit na matu yaw shada let, ya ten, Lungga Zup hta dum nta 600 hpe gaw gap da ngut sai raitim, ya ten, nta 100 ram hta sha masha htawt bang lu ai re.

Lai wa sai April 17 ya, Mali Zup hka madim masing kata bawm kapaw sai hpang, Myen a Jinghpaw Mungdaw uphkang rung (Pa-Ya-Ka) gaw, masing kata nga ai mare buga yawng hpe htawt sit kau na lam, May praw 1 ya shani nhtoi hte, ndau shabra laika shapraw dat sai.

Maga mi de, bawm kapaw ai hpang kawn ya ten du hkra, Myen gaw, mare htawt sit na ja ja ninghkap tawn ai Tang Hpre buga masha ni hte KIO/A masha ni hpe madung tawn let, “bawm kapaw ntsen ai mara” hte, laja lana rim jep zingri ai lam ni galaw nga ai re.

Maning December 21 ya kawn, Mali Zup hka madim masing hpe ta tut hkrang shapraw galaw sa wa ai hta, madung ja gumhpraw hte hpaji arang bang galaw nga ai gaw Miwa asuya a CPI (China Power Investment Corporation) rai nna, dai kaw Myen mung na Asia World Company hte Masat 1 Myihprap Wan N-gun Dap yan, garum lawm ai.

Ndai masing hpe, lai wa sai 2006 jep chyam hpang wa ai ten kawn ya ten du hkra, mungdaw madu J.W amyusha ni gaw, ninghkap nga dingyang naw re.