Masat Yan (5) Hpu-Awn Shalat Jawng yu hpawng hpe dai hpawt hkying 10:00Am aten Laiza Muklum, Sinpraw Majoi Manau Gawk Nu hta galaw ai lam chye lu ai.
Hpawng hpa awn lit hpe Mungchying Uphkang Dap Ningtau Lithkam rai nga ai Salang Kaba Npun Tu Zau Awng woi awn ai. Jawng yu mungga hpe Mungchying Uphkang Dap Lithkam Salang Kaba Lajawng Hkawng Lum kawn shatsam mat ai hta jawng ma ni yawng gaw myu tsaw myit masa majing hte magam lit bungli ni hpe shakut shaja apnawng gun hpai sa wa lu na matu num htet shatsam mungga shaga ai.
Wunpawng Mungdan Shanglawt Hpung Ginjaw Komiti hte Wunpawng Mungdan Shanglawt Kongsi Ningbaw Kaba, Salang Kaba Lanyaw Zawng Hra kaw nna mung Jawng yu jawngma ni, du sa ai Shawa masha yawng hpe hkalum la ai lam hte hkum tsup ai hku n'na shatsam mungga shaga ai lam chye lu ai.
Dai hpang kumhpa shagrau ai lamang hpe galaw mat wa ai. Lamang hta Ningtawn Kasi kumhpa shagrau ya ai lam, Laili laika ningtawn kumhpa shagrau ai lam hte jawng yu Lekmat masat pa ni hpe shagrau ap ya sai rai nna Ningtau Ninghtawn Up Hkang Du tsang sharawt dat sai rai nga ai.
Sharin Sara yawng a gawng malai Sara Kaba Sumlut Gun Shawng kawn dai ni jawng yu let ta tut magam bungli gunhpai sa wa na Ningtau Ninghtawn Du ningnan ni yawng Mung Shawa kamhpa ging ai hpu-awn kaja ni byin tai wa lu na matu hpaji jaw shatsam mungga shaga ai. Jawngma yawng a gawng malai Jawngma Ningbaw kaw nna mung du sa ai Hpu-awn Du Salang ni hte Kanu Kawa ni hpe nachying chye ju dum ai lam, matut nna hpaji jaw la mat wa na matu tsun lajin mat wa ai.
Ndai Zuphpawng hta sa du kabu lawm ai K.I.O Ningbaw Kaba Lanyaw Zawng Hra hte Ginjaw Komiti Salang ni, Magam Dap Makan Dap Lithkam hpa awn Du Salang ni, jawng yu jawng ma ni hte myit su Kanu Kawa ni yawng zuphpawng ngut ai hte manhkrum lu sha jawm sha let jawng yu hpawng hpe angwi apyaw sha ngut kre sai re lam, shana hkying 7:00Pm aten hta mung Jawng yu Yungwi Pinra Lamang kaba hpe galaw ai lam chye lu ai.
Ndai Hpu-awn Shalat Jawng gaw Ginjaw Uphkang Rung, Mungchying Uphkang Dap kata woi awn let hpaw sharin mat wa ai Jawng rai nna dai ni jawng yu ai jawngma yawng marai 100 tup re lam hpe chye lu ai.
Subscribe to:
Post Comments (Atom)
No comments:
Post a Comment