Chyurum Wunpawng Jinghpaw sha ni Mayam yam hpang wa ai lam

Chyurum Wunpawng Jinghpaw Mungchying sha ni hta lai wa sai ten hta mayam yam shajang ai hpe mu lu ai.Dai mayam yam hpang wa ai lam hpe sagawn yu yang,lawu de na hte maren sha sagawn chye lu ai.Dai pyi gaw dumsa jaiwa ni labau maumwi hpe zawn tsun hkai ai hpe sha na lu ai.



            N dai mayam yam hpang ai lam gaw,Chyurum Wunpawng Jinghpaw sha ni chyu sha,mayam rim yam,rim dut sha ,rai ma ai nrai.Lai wa sai prat ni hta mungkan ting hkan galaw let nga pra lai wa ai lam ni rai nga ai.

        Lai wa sai shaning A.D1000 ning daram aten hta Marip wa Kumja Magam gaw,Ningran ga de du ai shaloi,Kumran manau dum na hkyen wu ai.Shaloi Marip wa Kumja Magam gaw,"Ngai gaw shu kaw nau gam sha,Uhku htingra shara la,Ja wun hkindaw daw,tsit yan ningboi shara praw,rai nna she Kumran manau dum na we ai," ngu tsun let,Uhku Htingra shara la nna,Kumran manau dum wu ai.

        Marip wa Kumja Magam tsun ai ga lachyum gaw:- Masha ni kadai mung manau rai n dum yang,shawng ningnan manau dum na,Uhku Htingra shaza la na ,ngu ai gaw dai ten hta Uhku Htingra masha ni nga ma ai hte shanhte hpe mayam rim la let manau dum na,Ja wun hkindawng daw na,ngu ai gaw nta npan e naura htu na.Tsit yan Ningboi shaza praw na,ngu ai gaw kaga shara hkan na mayam hpe mung naw rim na,ngu tsun mayu ai lam rai nga ai.

       Shingrai Marip Wa Kumja Magam gaw , Uhku htingra ga na masha ni hpe mayam rim la nna,Kumran manau dum wu ai.Dai gaw Chyurum Wunpawng Jinghpaw sha ni hta,shawng ningnan mayam yam hpang wa ai lam tai wa sai.
       Dai hpang Matsaw Nhkum Wa mung,''Ngai mung shi lam naura wang na we ai;Anghkam shan nga mung shadut na; Dari yang tsun mung gut na" ngu tsun wu ai.

       Shingrai Matsaw Nhkum Wa gaw,Kahpu Marip Wa Kumja Magam manau dum ngut ai hpang,kade n na yang manau bai dum shachyaw wu ai.Matsaw Nhkum Wa Dari yang e nga ai masha ni hpe mayam sa rim nna,manau dum wu ai.Ndai gaw Chyurum Wunpawng Jinghpaw sha ni hta mali lang ngu na dum ai manau rai nga ai.

       Matsaw Nhku Wa tsun ai ga hta,Shi lam naura wang na,ngu ai gaw shi lam kaba ai naura htu na ngu ai rai nga ai.Anghkam shan nga mung shadut na,ngu ai gaw ,dusat rai nga ai nam na shan nga ni hpe mung naw rim na,ngu ai rai nga ai.Dari yang tsun mung gut na,ngu ai gaw Dai ten hta Dari yang ga e nga ai masha ni hpe mung rim na,ngu ai rai nga ai.Dai hpang she Kumran manau hpe dum shachyaw na,ngu ai rai nga ai.

       Ndai gaw Chyurum Wunpawng Jinghpaw sha ni hta ,Lahkawng lang ngu na mayam rim hpang wa ai lam rai nga ai.

       Dai hpang Wahkyet Wa a kasha Dingla Singgawng gaw,Lungja hpang hkang e ninghtawn ga de nna nga nga ai shaloi,Nung shayi sha langai mi la wu ai.Dai Hpang kade n na yang Dingla Singgawng gaw,dai shayi sha hpe nra kau wu yang,Nung shayi sha gaw mayu ga de bai wa mat wu ai.Nung shayi sha mayu ga de bai wa wu yang,Kanu Kawa ni gaw "Ndai Dingla Singgawng gaw,anhte a shayi sha hpe ndai zawn n gawn n sawn di ya ai gaw,'ngu nna myit n pyaw ai hte Nung ni gaw Dingla Singgawng hpe sat kau na lam tam mu ai.Shing rai nga yang,lani mi hta Dingla Singgawng gaw,Hkrang hka de nga dawn sha sha rai nna nga wu yang,Nung ni gaw ndan hte hkap gap sat kau mu ai.

       Dai hpang Dingla Singgawng a kahpu kanau ,mayu dama ni gaw Ngang Uma bum kaw nna rawt let Lahkaw Hkindawng ga na masha ni hpe sa rim la kau mu ai.

       Ndai gaw Chyurum Wunpawng sha ni hta masum lang ngu na mayam rim hpang wa ai lam re.

       Dai hpang Hkasha Hka a kasha N-gyi Nhpang gaw,Lahkaw Hkindawng ga de sa sa rai let,ma kaji ni hpe sha hpa jaw shalen la la rai nhtawm m kaji ni hte mawn wa ai shaloi,ma kaji langai hte langai hpe shi a nga shara Jin Bum ga de woi mat wa wa rai nna mayam rim wu ai.Shingra shaning na wa ai shaloi shi a nta n shang wa wu yang,nta hpe shachyaw jat jat rai wu ai.Dai shani kaw nna ya du hkra,''Marip dung kaji,Lahkaw hkindawng shara praw,galu htingnu shachyaw,'' ngu nna ga malai tsun shajang mu ai.N dai gaw Chyurum Wunpawng sha ni hta mali lang ngu na mayam rim ai lam tai wa sai.

        Dai Hpang Jasen amyu ni gaw,Hugawng ga de du ai ten hta,sinna maga Mungnun ga (Assam) de sa nhtawm ,Mungnun ga masha ni hte Kala amyu ni hpe sa lagu rim la la rai let,mayam shatai shajang mu ai.Ndai gaw Chyurum Wunpawng Jinghpaw sha ni hta manga lang ngu na mayam yam hpang wa ai lam tai wa sai.

        Lahta de madun da ai lam ni kaw nna hpang let,shada da len la pa sha rai nna,kung zet ai masha ni gaw,n kung n zet ai masha ni hpe manang shatai woi hkawm masu let,du hkawm ai shara hta ja gumhpraw lu.lata lum re ai masha ni hte hkrum jang,dut sha kau da da rai nna,dut sha hpang wa mu ai.Ja gumhpraw lu nna lata lu ai masha ni gaw,tinang nan n hkan rim la hkawm ma ai rai tim,sa dut pru ai masha ni kaw na,mari la la rai let,buga ginra shagu mayam ngu ai hpe yam hpang wa shajang ma ai lam chye lu ai.

         Bai nkau mi gaw tinang a kahtawng hkan na hpyi lu,lamun su ai masha ni hpe rim dut sha,hpya dut sha rai nna mayam yam wa shajang ai hpe chye lu ai.

        1927 ning daram aten hta,Inglik Asuya ni gaw Jinghpaw Mungdaw yawng hpe up hkang la kau ai hte mayam rem ai masha ni kaw na mayam ni yawng hpe,ging dan ai manu jahpu jaw nna bai shaw la kau mu ai,Mayam ni a asak hpe yu nna,Lap 80/-,90/-100/-,120/-,150/- rai nna mari shaw la kau mu ai.Dai ten kaw nna Chyurum Wunpawng jinghpaw mungchying sha ni a mung kata hta mayam ngu ai n nga mat sai rai.

         Chyurum Wunpawng Jinghpaw Mungchying sha ni a mung kata na mayam yawng marai 9000 jan( hkying jahku jan) rai nna mayam manu shaw nna htum mat wa ai gumhpraw yawng Lap 500000/- jan htum mat wa sai lam hpe chye lu ai.
          N dai gaw Chyurum Wunpawng Jinghpaw Mungchying sha ni hta gaja wa byin lai wa,hkan galaw lai wa sai lam hpe tsun hkai shajang ai hte naw kam shajang nga ai lam kaba langai mi rai nga ai rai

**Wunpawng Htunghking Laika kaw na bai ka bang ai re**