MUNGKAN AIDS MASAT N’HTOI (World AIDS Day)

Knet; 2010 ning December 1 ya.

Mungkan AIDS masat ninghtoi (World AIDS Day) hpe Ginjaw Hkamja Dap woi awn ai hte, 2010 ning December 1 ya shani Laiza Muklum kata hta AIDS ninghkap shamu shamawt ai lam galaw sa wa sai re hpe chye lu ai.

Ginjaw Hkamja Dap hte H.U (Health Unlimited) Kachin Project ni woi awn let 2010 ning November 29 ya shani kaw nna AIDS ninghkap ndau shakum shakap laika pa (Poster) shakap ai, AIDS ninghkap laika hpe mung Laiza Muklum kata shara shagu hkan gam shabra lai wa sai lam chye lu ai.

Matut nna 2010 ning November 28 ya shani Laiza Muklum, lahta Tsang Jawng ma ni hku nna HIV/AIDS hpe Ga Shagawp hte ka shingjawng ai, Laika kachyi (Essay) ka shingjawng ai, Hkrangpan sumla soi shingjawng ai lamang ni galaw wa sai lam chye lu ai. Shang shingjawng lawm ai hta ningtawn kasi lu ai jawng ma ni hpe mung kumhpa hte shagrau wa sai lam matut na chye lu ai.

2010 ning December 1 ya jahpawt hkying 5:00 Am. aten hta Laiza Ramma Komiti woi awn let Sweet December Marathon kagat shingjawng ai lamang hpe galaw wa sai. Matut nna 5:00 Am. kawn 6:00 Am. du hkra Ginjaw Hkamja Dap woi awn let Mung Shawa hte Dap Shawa yawng shang lawm ai HIV/AIDS ninghkap, lam hkawm shawa nsen marawn ai lamang galaw wa ai lam chye lu ai.

Matut nna, HIV/AIDS hte seng ai hpaji jaw mungga tsun shaleng dan ai Zuphpawng lamang hpe mung, Sinpraw Majoi Gawknu hta shani hkying 11 Am. aten galaw lai wa sai. Ndai Zuphpawng hta Hkamja Dap Lit Hkam, Du Kaba N’gan Zau Hkum kaw nna HIV/AIDS hte seng ai hpaji jaw Mungga tsun sanglang dan mat wa ai lam hpe mung matut na chye lu ai. Wunpawng Mundan Shanglawt Asuya, Mungchying Uphkang Dap Lit Hkam Salang Kaba Lajawng Hkawng Lum kaw nna mung HIV/AIDS hpe byin shangun wa chye ai Kani nanghpam lu sha htu ai hpe ninghkap koi gam mat wa ra ai lam hte seng nna, hpaji jaw mungga shatsam mat wa sai.

Zuphpawng hta sa du shang lawm ai , Wunpawng Mundan Shanglawt Asuya, Magam Dap Lit Hkam salang ni hte Mung Shawa Dap Shawa yawng, AIDS ninghkap shawa nsen marawn let, Zuphpawng hpe hpung dim dat ai lam chye lu ai.

Shana hkying 7:00 Pm. aten hta Shanglawt Masa Gat Hkai Hpung, Sinpraw Majoi Htunghking Ka Manawt Hpung hte Laiza Muklum Ramma shayi shadang ni shang lawm ai Mungkan AIDS ninghkap masat n’htoi Yungwi Pinra lamang hpe Sinpraw Majoi Manau wang hta galaw wa sai lam chye lu ai.

Wunpawng Mungdan Shanglawt Asuya Magam gun ni mung, Mungkan HIV/AIDS ninghkap nsen marawn let shang lawm.

Laiza Muklum mare lawk shagu na ni mung ndai zawn sa shang lawm.

Hkamja Dap Tsi Magan gun ni hte Tsi Jawng ma ning mung shang lawm nga.

 

 

Sweet December Marathon kagat shingjawng ai hte kumhpa la nga ai sumla ni.

Mung Shawa Dap Shawa yawng HIV/AIDS ning hkap nsen marawn nga yang.

Laiza Muklum Lahta Tsang Jawng ma ni mung ya na zawn sa du madat shang lawm nga.

Yungwi Pinra Lamang Mahkawn, Ka hkrang Sumla ni.