KIO ginjaw ginra makau de, Myen hpyen n-gun, laknak n-gun n’nan jat

Lai wa sai mali ya kaw nna, Jinghpaw mungdaw a sinpraw maga, KIO/KIA ginjaw ginra makau hta, Myen hpyen n-gun, laknak n-gun n’nan ni bai jat bang dat sai re.

Miwa ga jarit mayan KIO ginjaw ginra ni rai nga ai, Laiza, Alen Bum, Laisin Bum hte Mai Ja Yang ni hte ni ai, Manmaw (Bhamo) mare hta Myen hpyen n-gun hte laknak kaba ni hpe, hka lam hte hkarang lam lahkawng hku, jat bang wa ai lam, myi-chyaw-mu buga masha ni tsun ai.


Hpyen n-gun ni hpe, grau nna n’sin ten hta, hpyen mawdaw ni hte Mali Hka sanghpaw hku nna htaw bang ai re.

Ya, n’nan bai htaw bang ai laknak kaba ni hta, myawk kaba ni, majan gasat tank ni hte kaga laknak kaba ni mung ai lawm, Manmaw mare na hpyen masa yu maram ai ni tsun ai.

Lai wa sai November 30 ya shana kaw nna, laklak lailai Manmaw mare de lawu ga na Myen hpyenla ni hte laknak ni grai htaw bang wa ai majaw, buga masha ni grai hkrit kajawng nga ai lam, chye lu ai.

Buga masha nkau rai yang, Myen hpyen ni KIA hpe gasat wa sana sadu ai majaw, tinang a kun dinghku rai ni hpe, “jau htawt sit kau ai lam ni” mung galaw nga sai lam, KNG sagawn chye lu ai.

KIO/KIA gaw, kaga amyu bawsang rawtmalan hpung ni hte, “Munghpawm Dap” hku nna, Myen hpyen asuya hpe jawm ninghkap gasat let, jet ai munghpawm gaw de na matu, myit hkrum tawn ai lam nga sai re.

Dai myit rum Dap Hpawm hta, Karen (KNU), Sam (SSA-N), Wa (UWSA) hte Jinghpaw (KIO) dap ni gaw madung re.

Ndai ten, Myen gaw, KIO/KIA hpe lai wa sai September praw 1 ya kaw nna “hpyen hku masat” wa nhtawm, KIO/KIA hpe pat hkum ai lam ni langai hpang langai ninggam jat galaw nga ai re.

Raitim, asuya hta n-gun kaji ai rawtmalan hpung KIO/KIA gaw, “tinang maga hku nna shawng, asuya hpyendap hpe gasat na n re” ngu ai policy hta, ya ten du hkra dingyang tsap ai rai nga ai.