Myen hpyen asuya gaw shi a November praw 7 Ralata Poi hta amu kyin nga ai ten, Wunpawng Mungdan Shanglawt Hpung (KIO) gaw, tinang kani pat jasan masing hpe yat yat hte shaja galaw nga sai.
KIO gaw, ndai October 15 ya hpe jahtum nhtoi masat nna, Jinghpaw mungdaw kata kani nanghpam tsepkawp pat hkum kau dat ai, dai nhtoi kru ya lai ai hpang, kani nanghpam lu sha htu marawp ai ni hte kani hkai, kani shalai ginlen, dut hpaga galaw ai ni yawng hpe “hkamdaka jaw yin la shangun ai laika (form)” ni garan jaw nga sai re.
Myitkyina e sai lam kata kani hpraw htu bang nga ai ramma langai. Sumla: Kachin News Group
Ndai bat hpang Lahkawng Ya, October 19 ya shani kaw nna “ga sadi form” hpan lahkawng hpe, shawng n’nan KIO uphkang ginra na dapshawa mungshawa ni hpe garan jaw hpang sai lam, KIO Kani Nanghpam Pat Jasan Komiti a shi htawn shana ahkang lu Dukaba Nhpang Naw Bu tsun ai.
Dai form hta, lu sha ai ni hpe “Ngai gaw n lu n sha sai” ngu ai ga sadi hte, kani yi galaw ai ni, kani nanghpam dut hpaga galaw ai ni hpe gaw, “Ngai gaw n galaw na ga ai” ngu ai form hta hkamdaga jaw, hkam la shangun ai re lam, Dukaba Naw Bu sanglang dan ai.
Ndai form ni hpe KIO ginjaw Laiza e shanu nga ai dum nta shagu de mung, garan jaw tawn sai lam, buga masha ni hpe lakap let chye lu ai.
Maga mi de, tara lale ai kadai hpe raitim, lang hte lang sadi jaw yu nna n lu jang, tinang a mara hta hkan nna tsaw dik madang hku ahkyak la je yang sa wa na re lam mung, komiti sadi jaw nga ai lam, chye lu ai.
KIO gaw, kani nanghpam sadi jaw ndau laika hpe October praw 5 ya shani ndau dat ai hte, tinang Laiza daju de pru-shang galaw ai mawdaw, saike hte leng masum saike yawng hpe “kani nanghpam ninghkap hpaji jaw laika pa ni (sticker)” shakap ya ai re.
Raitim, dai mawdaw, saike hte leng masum saike ni, Laja Yang gate de le wa ai hte, dai kaw hkap sin ai Myen hpyenla ni gaw shanhte hpe hkap jahkring nhtawm, sinat hte madi hkra rai, shakap tawn ai KIO kani ninghkap laika pa ni yawng hpe bai gawng kau shangun ai lam, myi chyaw sakse ni tsun ai.
Ya ten, KIO gaw tinang ginra e kani pat jasan masing hpe n-gun dat galaw wa sai zawn, maga mi de, Myen uphkang ai Myitkyina mare kaba na nawku hpung ni hte htunghking hpung ni hte mung, rau sha jawm galaw na bawngban nga sai lam, Dukaba Naw Bu kawn chye lu ai.
KIO a kani nanghpam pat jasan masing a majaw, shawng de kani nanghpam aloi ali mai lu ai hte, kani lu sha masha law ai Laiza e, ya ten, kani tam yak wa nna, lu sha masha ni mung yawm wa sai lam, buga masha ni hpe lakap let chye lu ai.
No comments:
Post a Comment