Jinghpaw mungdaw, Hpakan e mungshawa datkasa hku ralata hkam na, Myen hpyen asuya a shingnan pati, Pyi-Hkai-Hpyu (USDP) a Slg. Ong Myit gaw, Hpakan buga masha ni hpe aten kadun Mungchying Masat Lakmat ni htuk jaw let, ralata zinlum nga ai re.
Nsam ahtoi re ai, Mungchying masat lakmat gaw pa de lema 6 rai nna, sumla n lawm ai sha, lang ai wa a mying, hkring dat hte “PKK (Phakant Kachin)” nambat ni hpe ka tawn da ai lam chye lu ai.
“Yayi kat (aten kadun lamat) ahtoi mat pung ting PKK (Phakant Kachin) kaw nambat ka shakap da ai hpe jaw ai re. La-wa-ka kaw na jaw ai re ai,” nga nna, Hpakan, Seng Tawng mare na salang langai tsun ai.
Mungchying masat lakmat htuk jaw ai lam hpe, seng ang ai, kahtawng rung kaw, mying bang da ai ni yawng hpe, Slg. Ong Myit hte La-wa-ka kawn pawng nna, Pyi-Hkai-Hpyu hpe ralata me jaw na matu, manu jahpu n la ai sha galaw ya ai rai nga ai.
2005-2008 Jinghpaw mungdaw (Dingdung Daw Daju snr Ma-Pa-Hka) a taimu dingsa Ong Myit gaw, mungchying masat lakmat htuk jaw nna, ralata me lu na matu zinlum ai hta n-ga, buga masha ni hpe, Kyat lap 100 dan je hte gumhpraw deng ga ni mung jaw nna, zinlum nga ai lam matut chye lu ai.
“Lap 100 dan mun mi hte gumhpraw deng ga 50 hpe hkan garan jaw taw ai,” nga nna, gumhpraw gam jaw ai hpe lu la ai, Hpakan buga masha langai tsun ai.
USDP Slg. Ong Myit gaw, lungseng lauban ni kaw na, gumhpraw hkan lahkawn taw ai hte, shi n pu na byuha mu, hpyendu ni hpe, lungseng lauban langai hpra hta, Kyat sen 10 hta lahkawn nna, dai gumhpraw hte sha, lauban ni hte mungshawa hpe bai zinlum taw ai re lam chye lu ai.
Mare salang ni hpe mung, shi a shingdu labau kadun ka da ai laika pa ni hte, gumhpraw ni hpe, gam jaw shangun ai lam chye lu ai. Gumhpraw hkap la lu ai buga masha ni gaw, Pyi-Hkai-Hpyu datkasa Ong Myit hpe, kade n ra sharawng tim, ralata me jaw ra sana re lam, buga masha ni tsun ai.
Hpakan ginwang hta, mungchying masat lakmat ajet langai lu na matu, Kyat 140,000 ma hkam ra ai lam, mat-pung-tin galaw da ai, buga masha langai tsun ai.
No comments:
Post a Comment