Lai wa sai bat kru ya, October 23 ya shani, hkying 1 kawn 2 lapran, shawng de Masat 1 Munggu Pyada Dap, ya, pyi-tu-sit dap hta, pyi-tu-sit marai 3 mayun gap sat hkrum nhtawm, shanhte a Miwa sinat masum hte sinat pala ni (M-22 langai, M-21 lahkawng hte pala 200 jan) gashun la mat ai lam, buga salang langai tsun ai.
Munggu mare madun map.
Sat hkrum ai pyi-tu-sit ni gaw, Duwa Zuk Dau hte kasha Sara Naw Hkam, woi awn ai Munggu Pyi-tu-sit hpung rai nna, hpyen n-gun 100 jan nga ai re.
Yangon kaw malawng nga ai Duwa Zuk Dau hte, Lashu kaw hpung sara galaw ai, kasha Naw Hkam gaw, Myen hpyen asuya a November praw 7 ralata poi shang na hte seng nna, Munggu de du wa hkyen ai hkying hkum 3 ram ra ai ten, ya na zawn shan wa a ma 3 gap sat hkrum ai re lam, Munggu shiga lawk hku chye lu ai.
Matut manoi, hpang shani, Laban shana de hkying 5 jan hta mung, Munggu-Hpawng Seng lapran, gate hpaw lam pat nna, hkauna galaw ai buga masha ni n ngam hkra, n tara gumhpraw hta sha nga ai, mungshawa bu hpun pawng hte Myen pyada langai mung, gap sat hkrum sai re.
Raitim, ndai mabyin lahkawng hta lit nga ai ni kadai, gara uhpung uhpawng ni rai nga ai hpe ya ten du hkra garai n chye shi ai.
Dai re majaw, ya ten, Myen hpyenla ni hte pyada ni gaw, Munggu e nga ai kaga pyi-tu-sit uhpung ni hte, buga masha ni hpe madung dat let san jep nga ai lam, KNG sagawn chye lu ai.
Ndai ten, Myen gaw Munggu de, shi a hpyendap dap dung masum hpe sa tawn ai rai nna, shanhte gaw Munggu hte Hpawng Seng buga masha ni hpe, atik anang bunker gaduk ni htu shangun ai nna, de a matu ra ai hpun tawng ni mung shaw shangun nga ai lam, chye lu ai.
Dai hpyendap ni gaw, Kutkai dap Hka-La-Ya masat 45, Nam Hpak Ka dap Hka-La-Ya masat 123 hte Hopang dap Hka-La-Ya masat 145 ni re.
No comments:
Post a Comment