Marip,Lahtaw hte Lahpai Amyu ni "JA" Mying Lu ai Lam

Chyurum Wunpawng sha ni Ningran ga e nnan du hkrat wa let ninghtawn ga de wa ai ten hta,Chyurum sha ni yawng ,rai n bra shi ai sha naw nga shajang ma ai.


Shingrai Ningran ga e naw nga yang Wahkyet Wa a kasha Lahpai Daina La hpe shaprat wu ai.Lahpai La hpe shaprat ai shaloi, Lahpai La a shadai hpe shana aten re majaw ,rai n lup kau ma ai,shadai majaw hpe npan dap karap kaw naw mara da mu ai.


Lahpai La daidaw ai shana Hkindu yang ga na "Sam" ni mung,sa du lai hkawm let manam hkrup mu ai.Dai Sam manam ni gaw,shana shat shadu sha ai shaloi,npan dap karap matu e majaw mara tawn ai shadai majaw hpe " Wa Shan,Wa Pu" majaw mara tawn ai shadu nhtawm,shadu sha kau ya mu ai.

Shaloi ma Lahpai La gaw, shadai kaw hpye wa let ,hpa baw tsi tam bang rai tim,n mai hkraw wu ai.Lani hte lani grau grau ana hpye wa ai majaw,Hkindu yang ga na sa lai manam yup ai Sam ni hpe sa tsun san mu ai.Shaloi Sam ni gaw,ma Lahpai la a shdai kaw bang ya na matu "Ja shingmun" ndum kaji langai mi jaw dat mu ai.Sam ni hpe sa tsun dan ai wa gaw,Marip Wa Kumja Magam rai nga ai.

Marip Wa Kumja magam gaw,ja ndum gun nna nta du wa ai shaloi ,"Ja ndum gun let,dai ni na ja ndum gaw grai li ai law" ngu tsun let ja ndum wa shaw ya wu ai.Ma Lahpai La a kawa Wahkyet Wa mung,Marip Wa Kumja Magam gun wa ai ja shingmun hpe la nhtawm,ma lahpai la a shadai kaw mun bang ya wu ai.Shaloi ma Lahpai La a shadai gaw lani hte lani mai mat wa wu ai.

Lahtaw Naw Lawn gaw Lahpai La hpe ja shingmun bang ya ai mu jang,"Nau hpe pyi gaw,ja shingmun bang ya ai gaw ,ngai hpe mung she bang ya rit"ngu tsun wu ai.Shaloi Wahkyet Wa gaw,"Ya ja shingmun htum sai" ngu wu yang,ndum hta kap ai sha pyi krang nna rai tim she bang ya mi,bai ngu wu ai.Dai hta n-ga,ja ndum hpe sha pyi naw jum yu na"ngu bai tsun wu ai.Ndai ga matsun ni hpe hkan nna, dai ni du hkra masat masa mying ni tai nan mat wu ai rai nga ai.

Lahta de na lam masa ni hku hkan nna ,Marip,Lahtaw hte Lahpai ni masha mying ni shamying yang ja mying ni lang hpang wa ai lai rai ng ai.Marip Wa Kumja Magam gaw hkindu yang de na Sam ni kaw na ja ndum gun wa yang,"Ja ndum grai li ai law" nga ai ga a majaw,Marip amyu sha ni hpe"ja li la ni,ja tsen ma ni"nga nna dai ni du hkra,mying shamying shachyaw mat wa ia lam npawt nhpang rai nga ai.

Lahtaw Naw Lawn gaw"Nau hpe pyi bang ya ai gaw,ngai hpe mung bang ya mi,"ngu tsun ai shaloi ja htum sai ngu yang "N dum hpe krang nna sha rai tim bang ya mi'' ngu ai hta n ga,"ndum hpe sha pyi jum yu na"ngu ai ga a majaw,"Ja jum la ni,Ja krang ma ni"ngu nna shamying mat ai lam a npawt nhpang langai mi rai nga ai.

Bai,lahpai La gaw shadai hpye ai tsawmra na mat wa sai majaw,shadai nna lu ai La,ngu ai hku nna shi a mying hpe mung,Lahpai Daina La,ngu shamying mat ai hte " ja mying shamying ai a npawt" madung langai mi rai nga ai.Dai majaw ,Lahpai amyu sha ni gaw,kadai wa rai tim,''Ja mying hpe mai shamying mat wa ai matsun a npawt nhpang lam kaba rai nga ai rai.
N dai zawn rai byin ai ten hta Chyurum Wunpawng sha ni yawng gaw,kanu kawa langai a kasha ni zawn nga shajang ai hte,kahpu kanau ngu nna hkrai,nga shajang ai ten rai nga ai.Dai majaw hpu wa,nau wa,ngu nna amyu lakung lama n bung shajang rai tim,nta langai kaw ,masha ni hku hkan nna tsun shaga hkat shajang ai ten rai nga ai rai.

**Matsing..Wunpawng Htunghking laika kaw na bai ka bang ai re....