Wunpawng Mungdan Shanglawt Hpung (KIO) gaw, dai ni April 16 ya shani hta, tinang ginjaw Laiza Muklum, Manau Wang na, Sinpraw Majoi Gawknu hta, Jarit Sin Dap (BGF) hte alak mi dapshawa mungshawa sanglang dan ai lam, galaw sai re.
Ndai sanglang hpawng hta Jinghpaw Mungdaw shara shagu hte Sam mung de na Jinghpaw amyu sha ni, Laiza nga mungshawa ni hte KIO/A magam gun ni yawng hpawn 2400 daram sadu shanglawm ai hpe zuphpawng lawm ai ni kawn tsun ai.
KIO ninggawn amumadu Dr. Lahkyen La Ja gaw Jinghpaw hku sanglang dan ai rai nna, KIA Tau Dap Awn Daju (VCS) Du Up Daju Sumlut Gun Maw gaw Myen ga hku sanglang dan ai lam chye lu ai.
“Ga san ga htai galaw na matu du sa ai shawa yawng hpe ahkang jaw da tim kadai n rawt san ma ai,” nga nna, zuphpawng lawm ai buga masha langai tsun ai.
BGF hte seng nna, sanglang dan ai ndai zuphpawng hta, gasan gahtai galaw na matu ahkang jaw da ai hta nga, sa du ai ni kaw nna, hpaji jaw mayu ai lam ni hpe tang madu lu na matu, hpaji jaw laika sadek hpe mung Gawknu shawng kaw tawn da ya ai hpe chye lu ai.
Jahpawt hkying 10 kawn shana de hkying 2:30 du hkra galaw ai ndai lamang de, myit lawm ai ni kadai mung sa madat mai ai rai nna, BBC hte Miwa mungdan kaw daju ai, maigan na shiga dap ni mung sa du ai lam chye lu ai.
“Shanglawt maga na gaw BGF hpe n hkap la lu ai sha, simsa lam hpe matut shagrin lu hkra, kaga mai byin ai lam hku nna, matut shakut mat na re nga tsun mat wa ai,” nga nna, ndai lamang kaw KIO gaw, shanhte byin mayu ai lam hpe tsun jahpra dan wa sai hpe, buga masha ni tsun ai.
Myen hpyen asuya gaw, KIO hpe du na ra ai, April 22 hta BGF de gale na lam hpe asan sha mahtai jaw na matu, matsun da sai rai nna, April 28 ya kawn BGF de hkrang shapraw sa wa na matu re ai hpe zuphpawng lawm masha ni hku chye lu ai.
Ndai zuphpawng hta, daw dan ai lam ni hpa n nga ai raitim, mungmasha ni hte ndai zawn bawngban jahkrup ai gaw, kaja ai lam re nga nna, sa du ai mungmasha ni tsun ai.
Mungmasha ni hte bawngban jahkrup wa ai gaw, KIO ni a hpang jahtum daw dan na nhtoi du wa nna, yak wa ai majaw mung rai na re nga nna mung sawn maram nga ma ai hpe chye lu ai.
“Myen ni pyi n hkraw taw sai hpe naw bawngban taw ai gaw alaga sha re,” nga nna, mung KIA hpyenla langai shi a ningmu hpe tsun wa ai hpe na lu ai.
“Hpa mi rai rai, ya na zawn mungmasha ni hte bawngban jahkrup ai gaw, kaja ai, shawng de gaw, shanhte hkrai hpawng, shanhte hkrai daw dan ai re,” nga nna, zuphpawng lawm ai buga masha langai shi a ningmu hpe tsun ai.
Subscribe to:
Post Comments (Atom)
No comments:
Post a Comment