Wunpawng Mungdang Shanglawt Hpung (KIO) gaw, Myen hpyen asuya matsun ai BGF hte seng nna, 3 lang ngu na mungshawa zuphpawng bai shaga sai lam, KIO shiga lawk tsun ai.
Ndai zuphpawng hpe April 16, du na bat hpang Manga Ya shani, Jinghpaw Mungdaw a sinpraw maga, Miwa ga jarit makau, Laiza daju e galaw na re nga nna, Laiza e nga ai KIO ginjaw salang ni tsun ai.
Laiza na ginjaw salang ni tsun ai hku nga yang, ndai zuphpawng hta mungchying kanu kawa ni hpe, “hpa majaw BGF hte seng nna, KIO gaw Myen hte bawngban mahtai tam n lu ai lam” hpe, Myen hte bawngban ngut sai zuphpawng ni hpe lakap nna, azin ayang hpyan dan na re, nga ai.
KIO npu, Wunpawng Mungdan Shanglawt Hpyendap (KIA) hpe Myen hpyendap npu tawn na Jarit Sin Dap (Border Guard Force) gabaw hta, KIO gaw Myen hte, Jinghpaw mungdaw daju Myitkyina e, maning April shata kaw na rai yang, yawm dik 13 lang, hkrum bawngban sai re.
Ndai shata 28 ya shani jahtum tawn nna, Jarit Sin Dap (Border Guard Force) hpe “hkap la, n hkap la” mahtai hkrak jaw na matu, Myen gaw KIO hpe kalang bai matsun tawn ai ten, ndai Laiza mungshawa zuphpawng pru wa ai re.
Nde a shawng,myen gaw February 28 ya hpe jahtum nhtoi masat ya sai raitim, KIO hku nna mahtai hkrak n jaw ai gaw, ya ten du hkra rai nga ai.
KIO gaw, maning May shata 12 hte 13 ya hta kalang, hte September praw 5 ya hta kalang rai, Jinghpaw mungdaw hte Lahta Sam mung na mungchying mungshawa kanu kawa ni hpe Laiza de shaga nna, “KIO gaw Myen a BGF” hpe hkap la “mai, n mai” hte seng nna hpaji jaw na matu, zuphpawng shaga sai re.
Ndai zuphpawng ni hta, mungshawa ni gaw, Myen hte KIO lapran, dinghku majan n’nan bai byin na hpe n ra sharawng ai raitim, “BGF hpe gaw n mai hkap la na re lam” hpaji jaw wa sai re.
Apr 14, 2010
Subscribe to:
Post Comments (Atom)
No comments:
Post a Comment