KIO, Jarit Sin Dap gale na, jahtum nhtoi bai masat hkrum

Wunpawng Mungdan Shanglawt Hpung, KIO hpe Myen hpyendap npu taw ai “Jarit Sin Dap” gale na hte seng nna, “hkap la, n hkap la” asan sha dawdan ya na matu, jahtum nhtoi bai masat ya sai re.


Ndai shata 28 ya shani jahtum tawn nna, Jarit Sin Dap hpe asan sha hkap la n hkap la dawdan ya na matu, Myen gaw KIO hpe dip n-gun jaw nga ai lam, KIO du salang ni hku chye lu ai.


Lama, ndai lam ntsa dawdan na matu KIO ningdang ai rai yang, Jinghpaw mungdaw, Myitkyina, Manmaw, Hupin hte Danai mare ni kaw jung ai, KIO Kyit Hkai Rung ni yawng, pat kau ya na, nga nna mung, Myen gaw KIO hpe sadi jaw tawn ai lam, KIO salang ni hku matut chye lu ai.

KIO maga hku nna gaw, ya hpang jahtum masat ya ai nhtoi shani mung, hpyen asuya ra sharawng ai mahtai jaw na masa n nga ai lam, KIO du salang ni tsun ai.

April praw 4 ya, Laban Ya shani, KIO ningbaw ni, hpyen asuya a Naypyitaw datkasa Lat Du Daju Jum Ye Myint hte Myitkyina e hkrum ai shaloi, ndai April 28 ya hpe jahtum tawn nna Jarit Sin Dap hpe hkap la n hkap la, ahpraw achyang mahtai jaw na matu, Myen dukaba kawn KIO datkasa hpung hpe kahtap matsun dat sai lam, KIO salang ni hku chye lu ai.

Ndai lam hte la kap let, kade n na yang, mungshawa zuphpawng galaw na, KIO ginjaw hkyen lajang nga sai lam, Laiza daju na KIO ginjaw salang ni tsun ai.

Jarit Sin Dap gabaw hta, Myen hte KIO lapran, 13 lang hkrum shaga sai raitim mahtai n lu ai re. Hpa majaw nga yang, Myen gaw KIO hpe Jarit Sin Dap gale na sha tsun shadut nga ten, KIO hku nna gaw, uhpung lahkawng lapran na mungmasa manghkang shawng n hparan lu ding sa, hpyendap hkrang galai na, n hkap la ai majaw r