Ndai bat bat manga ya, April 16 ya shani, Laiza e galaw na Jarit Sin Dap (BGF) hte seng nna sanglang dan ai lamang de, myit lawm ai mungshawa masha ni kadai mung sa du madat mai ai lam, KIO saw shaga dat sai re.
Tara shang saw shaga laika ni hpe, Jinghpaw mungdaw a madung mare daju--- Myitkyina, Manmaw ni de mani shabra dat sai re lam, Laiza daju na KIO salang ni tsun ai.
Saw shaga laika hta, “Myen hpyen asuya kaw nna Wunpawng Mungdan Shanglawt Hpyendap (KIA) hpe Jarit Sin Dap (Border Guard Force) gale na matu, maning April shata 28 ya shani kaw nna ya ten du hkra, tsun shadut nga ai hte seng nna, KIO hte hpyen asuya lapran bawngban jahkrup hkat nga ai masa lam ni” hpe sanglang dan na re, nga ai.
Ndai lamang hpe, Laiza Muklum Manau wang kata, Sinpraw Majoi Gawknu e buga ten jahpawt hkying 10 a.m. kaw galaw na hta, lamang hpe KIO ginjaw salang ni woi awn mat na re lam, chye lu ai.
Lak lai lam langai gaw, ndai lamang de myit lawm ai mungchying mungmasha ni kadai mung shanglawm mai ai lam, saw shaga tawn ai lam re.
Bai lahkawng gaw, shawoi gaw Laiza zuphpawng de sa du ai shawa masha ni yawng a hkawm sa hkawm wa lam, manam jarawp hte malu masha jarik ni mahkra hpe KIO lit la ya sai raitim, ndai lang gaw tsepkawp lit n la ya sai re lam, KIO salang ni tsun ai.
Ndai April shata 28 ya shani hpe jahtum tawn nna, BGF hpe hkap la n hkap la, ahpraw-achyang mahtai jaw na matu, Myen gaw KIO hpe matsun tawn sai raitim, kaja wa gaw April 22 ya shani hta mahtai jaw shangun ai lam, KIO ginjaw salang ni hku chye lu ai.
Subscribe to:
Post Comments (Atom)
No comments:
Post a Comment