Mali Zup hka madim galaw ai shara kaw, bawm kapaw hkrum nna, masha 4 si na, 12 lahta hkala hkrum sai raitim, ndai mabyin ngut ai hkying hkum 24 na ai hpang, hka madim hpe matut gawgap na re lam, Myen hpyen asuya ndau shana wa sai.
Jinghpaw mungdaw dap up (taimu) du daju Soe Win gaw, Myitkyina a dingdung de deng 25tsan ai, Mali-N’Mai Zup makau, Chyinghkrang mare hta, mani buga ten hkying 11 kawn 12 lapran, shawa zuphpawng shaga nhtawm, hka madim masing matut galaw na lam, mungga tsun wa sai hpe, zuphpawng lawm ai ni tsun ai.
Lai wa sai bat kru ya jahpawt jau hkying 2:45 a.m. daram hta, hka madim gawgap company rung daju ai, Lungga Zup hte Chyinghkrang mare lapran, shara manga hta bawm kapaw hkrum sai hta, Miwa company amu galaw masha ni malawng si hkrung si htan hte hkala nba hkrum sai re.
Ya ten du hkra, kadai bawm kapaw ai re lam gaw, n chye shi ai.
Bai, Taimu Soe Win gaw, ndai zawn bawm kapaw n hkrum hkra makawp maga na matu, buga masha ni hte asuya shimlam dap ni pawng galaw na lam mung, zuphpawng hta tsun wa sai lam, matut chye lu ai.
Bawm kapaw ai kaw si lawm ai Miwa amyusha ni a moi mang, hkala hkrum ai ni yawng hte hpawn, kaga company amu galaw masha 300 jan gaw, bawm kapaw ai jahpawt bus mawdaw kaba 4 hte, Miwa ga jarit Kambaiti de lawan ladan nhtang wa mat sai lam, myi-chyaw-mu buga masha ni tsun ai.
Bai nna, nga lakmat n lu ai Miwa company amu galaw masha nkau mung, ya ten, Myitkyina hte Waimaw mare lahkawn hta hprawng yen let kanu mungdan de bai nhtang wa na shakut nga ma ai lam, KNG sagawn chye lu ai.
Miwa asuya a ga jarit sin dap ni hpe lakap let chye lu ai hta, “Mali Zup madim masing hpe buga masha ni ninghkap ai lam grai law wa ai majaw, dai de company amu galaw masha ni garai n sa na matu, Miwa asuya hku nna jau sadi jaw da ai re” nga ai.
Maga mi de, bawm kapaw ai jahpawt jang, Myen Taimu Soe Win gaw, Wunpawng Mungdan Shawnglawt Hpung (KIO) hpe shanhte kapaw ai rai n rai, telephone hte Laiza de san wa sai re.
Dai re majaw, Laiza daju na KIO/KIA du salang masum--- ninggawn amumadu kaba Dr. Lahkyen La Ja, Dai Lawn Rung, G-1 kaba Col. Hkawng Lum hte kaga KIA dukaba ni, Myitkyina de sa nna Taimu Soe Win hpe “KIO bawm kapaw ai tsepkawp n re lam” sa sanglang dan sai lam, KIO shiga lawk tsun ai.
Ndai bawm kapaw ai hte seng nna, KIO mung hkyak hkyak zuphpawng galaw nga ai lam KNG sagawn chye lu ai.
Mali Zup de bawm kapaw ai shani kaw nna, Taimu Soe Win a matsun hte maren, Myitkyina-Waimaw-Manmaw lam, Myitkyina-Waimaw-Kambaiti lam hte Manmaw-Kai Htik-Nam Hkam-Muse lam ni hta, moi majan prat na zawn, pru-shang bu hkawm masha yawng hpe Myen hpyendap ni laja lana jep sawk nga sai lam, buhkawm masha ni hku chye lu ai.
Bu hkawm masha ni tsun ai hta, mungmasha ni sha n ga, KIO/KIA du salang ni hpe du hkra, grau nna, Laja Yang gate hta mungchying masat lakmat, arung arai ni hte masha hkum nan mung sawk jep nga ai re, nga ai.
Mali Zup hka madim masing bawm kapaw hkrum ai lam hpe, Jinghpaw mungchying shawa gaw kabu n-gun jaw nga ma ai re. Hpa majaw nga yang, mungchying shawa ni myit n hkrum ai lapran, Myen hte Miwa asuya gaw, hka madim hpe galaw nga ai re.
Ndai masing hpe, Miwa asuya madu ai, China Power Investment Corporation (CPI) a ja gumhpraw, arung arai hte machye machyang arang bang ya ai npu, Myen mung na Asia World Company hte Myen hpyen asuya a No.1 Myihprap Wan Hkringmang Dap yan, shanglawm galaw ai, rai nga ai.Bawm kapaw hkrum tim hka madim matut galaw na lam, Myen tsun
April 19, 2010
KNG
Subscribe to:
Post Comments (Atom)
No comments:
Post a Comment